 |
Myen hpyendap Hk.M.Y 389 a gap sat hkrum ai Jinghpaw tsang 9 jawngnum Ja Seng Ing |
Lai wa sai 2 ning jan Jinghpaw Mungdaw Hpakan Ginwang kawn tsang 9 jawngnum gap sat hkrum ai manghkang hpe shawk shawn da ai wa; kawa Slg. Brang Shawng hpe tara nhtang jawat da ai amu manghkang hpe dawm kau ya na matu Fortify Rights uhpung malawm mungdan gadaga shinggyim ahkaw ahkang hpung ni gaw Gumsan Magam Slg. Ting Tsing hpe December 18 ya sha hpyi shawn dat ai.
2012 ning September 13 ya shani Hpakan ginwang Maw Wan buga lawk (1) Sut Ngai Yang kahtawng na asak (14) ning pang tsang (9) jawngnum kasha Shy. Ja Seng Ing hpe gap kau ai Myen asuya dap hku nna Slg. Brang Shawng asak (49) ning hpe tara jawat da ai manghkang kawn dawm kau ya na matu sumbu laika jaw let hpyi shawn dat ai lam rai nga ai.
December praw 8 ya shani gumsan magam slg. Ting Tsing hpang de laika man 4 lawm ai sumbu laika hpe Fortify Rights, shinggyim ahkaw ahkang yu reng hpung, mungdan gadaga hte seng ai shalawt lu ahkang jaw uhpung kaba, shinggyim ahkaw ahkang a matu tsi du uhpung ni shanglawm ai hpung 6 gaw December 18 ya shani shapraw dat ai re.
“Slg. Brang Shawng hpe mara tawt lai ai lam hte tara jawat da ai gaw Myen hpyen dap, tara dawdan lam hte shinggyim ahkaw ahkang komishin ni kata hta shinggyim ahkaw ahkang hpe galoi mung n chye masu su taw nga ai jasat hpe htawng madun taw nga ai” nga Fortify Rights magam gun Matsun Du (Director) Matthew Smith kawn tsun ai.
“Daru magam manat ai gaw mara tawt lai shut shai ai hpyenla ni hpe mara n shagun ai. Slg. Brang Shawng zawn re ai tengman lam hte tara rap-ra lam a matu tsap shakut ai ni hpe gaw matai dawk ai baw n re” nga ndau laika hta shaleng bang da ai.
Fortify Rights uhpung ni gaw 2014 ning August shata kawn September shata laman Shy. Ja Seng Ing gap sat hkrum ai manghkang hte seng nna kawa rai nga ai wa hte michyaw sakse marai (5) ni hpe san shaga ai lam hte sumla hkrung, sumla dem da ai sakse sakgan ni hte tara rung hta tang madun mat wa sai laika ngau ni hpe kalang bai da-bat jep joi mat ai.
Shy. Ja Seng Ing si ai manghkang gaw Myen asuya dap hta lit nga ai lam Fortify Rights kawn asan sha kamsham nna Slg. Brang Shawng hpe tara jawat da ai manghkang gaw n byin ging ai jasat re lam mung shaleng bang da ai.
Shayi sha si ai manghkang hpe 2012 ning October praw (1) ya shani Myen Mungdan amyu sha shinggyim ahkaw ahkang komishin hpang de shawk shawn dat ai manghkang ntsa n teng n man shawk shawn ai ngu nna Slg. Brang Shawng hpe mara tawt lai tara daw; 211 hte Myen asuya a ningtau hpyenman up Dukaba Za Nyi Min Pai kawn Hpakan Tara Rung e tara jawat da ai lam re.
Myen asuya dap hpyen n-gun 80 daram nga ai Hk.M.Y Masat (389) hpyen hpung gaw manghkang byin ai shani e Maw Wan mare hta gan hkring nga let shana daw hkying 4:00 daram hta mare kawn le wa na hkyen lajang nga ten, kapaw nsen na ai majaw KIA shadu nna dai mare kata e nan majoi hkup mara gap ahprup bang wa ai nga Slg. Brang Shawng a shawng shawn laika hta mu lu ai.
2013 ning April praw 9 ya shani shawng nnan lang rung dung jep joi ai ten e tara shawk wa; N/T hpyen man up Dkb. Za Ni Min Pai gaw Shy. Ja Seng Ing si ai manghkang gaw hpyen dap kawn gap ai majaw si mat ai n re sha Wunpawng Mungdan Shanglawt Hpyen Dap (KIA) a bawm a majaw she re nga tara rung hta tsun shapraw mat ai lam chye lu ai.
Mr. Matthew Smith gaw “ndai zawn n rap-ra ai lam ni hpe hparan na matu shinggyim ahkaw ahkang komishin kaw lit nga ai raitim shinggyim ahkaw ahkang komishin gaw ya ten du hkra zim zam rai taw nga ai” nga tsun ai. “Komishin hku nna Slg. Brang Shawng a manghkang hpe azin ayang sawk shagawn htawng madun ya let shanhte galaw lu ai ahkang aya shangwang e hpapdim hpadaw tai ya na matu grai wa gaw n hpang hkrat shi ai” nga shi kawn tsun ai.
Slg. Brang Shawng hpe 2 ning jan tara jawat da ai tara shawk wa; Dkb. Za Nyi Min Pai gaw shawng nnan lang rung dung ai ten sha dung nna hpang daw de gaw ya ten du hkra rung dung ai (48) lang du hkra Hpakan Myune Tara Rung de sa dung ai lam n nga ai majaw manghkang hparan ai lam n nga ai sha rung dung ten sha lung taw ai nga Slg. Brang Shawng kawn tsun ai.
“Tara rung a hkringdat n mu mat ai majaw naw tam taw nga ai. Shi hpe n lu shaga taw nga ai. Ngai hku nna gaw tengman ai maga hku na jep joi ya yang chyawm ngai hpe jawat da ai amu manghkang mung shi hte shi prai mat na re ngu kam ai” nga Slg. Brang Shawng kawn tsun ai.
Du na December 30 ya hta mung 49 lang ngu na rung dung ten bai kahtap masat da ya ai nga chye lu ai.
December praw (6) ya shani Slg. Brang Shawng hte Shy. Ja Seng Ing si mat ai manghkang a matu tengman ai hku sawk shapraw komishin ni gaw Yangung Myu e Shiga Sanglang Hpawng galaw nhtawm asuya hku nna komishin langai hpawng ninghtan ya nhtawm shayi sha a manghkang hpe jep shagawn ya na matu hpyi shawn mat ai.
Tara masa kaup lam hte simsa ngwi pyaw lam komishin ningbaw Jan. Awng San Tsu Chyi ni hpang de mung shawk shawn da sai raitim ya dai ni du hkra hpa htang shana wa ai lam rai n nga shi ai rai malu ai.
0 comments:
Post a Comment