UN garum ntum hkring nga ai majaw Jinghpaw tsin-yam dabang hta lu sha yak wa na

Dec-15-2014 Myen asuya MPC hte amyusha rawt malan hpung NCCT lapran Htai mung Chiang Mai mare kaw hkrum shaga nga yang

Munghpawm Simsa Lam Hkrang Shapraw Komiti (UPWC) hte Mungdan Ting Madang Gap Hkat Jahkring Bawngban Hpung (NCCT) ni December 25 Hkrismat n du shi yang Yangung Myu hta hkrum shaga na matu December 15 ya shani NCCT hte Myanmar Peace Center (MPC) rung ni Htai Mungdan Chiang Mai mare hta hkrum shaga bawngban nhtawm jawm myit hkrum da masai.

“Matut bawngban na, n mai hprai ai ngu ai masa a majaw sha le. Dai majaw Hkrismat rai n du yang n byin byin kahtap hkrum na matu dawdan da ai lam nga ai le. Anhte bai hkrum na matu nga ai” nga bawngban hpawng ngut ai hte Shi Htawn ni hpe NCCT malawm Dukaba Hkun Uk Ka tsun ai.

December praw 2 ya shani NCCT maga kawn ga san san da ai lawnglam 5 a ntsa Hkringmang Slg. Awng Min kawn ndai laman bai htang shana dat sai raitim nkau lawnglam ni hkan ngang kang hkrum tsup ai lam n nga nna myit dik ai lam n lu shi ai a majaw du na Yangung Myu kaw hkrum shaga bawngban ai hpawng hta kahtap bawngban mat na matu myit hkrum da ai nga tsun ai.

Laiza kaw byin mat ai Wunpawng Mungdan Shanglawt Hpung (KIA) Hpyen Du Shalat Jawng hpe laknak kaba hte gap bun ai lam ntsa lit la hparan jasan ya na matu hte hpawn lawnglam 5 hpe UPWC hpe san da ai lam ntsa kahtap bawngban jahkrup na matu naw ra rawng nga ai lam Dkb. Hkun Uk Ka kawn tsun ai.

“Kahtap hpyi shawn mat na naw ngam ai. Gsd; mabyin masa hkrak chye lu na matu ngu ai daw ni, hkra machyi hkrum mat ai uhpung uhpawng 5 hte ngam ai uhpung uhpawng ni hte hkrum shaga hparan jasan na matu ngu ai dai zawn re masa ni a ntsa anhte tara shang hpyi shawn nhtawm matut bawngban mat na” nga Hkun Uk Ka matut tsun ai.

Du na Hkrismat rai n du yang hkrum shaga bawngban na matu myit hkrum da sai raitim dai bawngban hpawng hpe “bungli bawngban jahkrup hpawng” ngu mying shamying nhtawm lahkawng ya bawngban na matu NCCT maga kawn tang shawn wa ai nga MPC kawn Slg. La Mawng Shwi tsun ai.

“Daini hpang jahtum bawngban hpawng hta hkrak tsun lu ai gaw Hkrismat rai n du yang bawngban hpawng nga na re. Ndai bawngban hpawng hpe gaw NCCT maga kawn bungli bawngban jahkrup hpawng ngu gabaw dat mayu ai, Teng sha nga jang 7 lang ngu na bawngban hpawng galaw ra na. Shanhte NCCT gaw 7 lang ngu na bawngban hpawng hku nna n kam lung ai. Bawngban jahkrup ra ai ni naw nga ai. Rai timung NCA kahtap bawngban na re nga tsun ai. Amaren sha re. Dai gabaw hte sha bawngban na re” nga tsun ai.

Lai wa sai mali ya daram hta NCCT ni san shateng da ai lawnglam ntsa Hkringmang Slg. Awng Min hku nna bai htang shana wa ai hta nkau dawshan ni hpe du na Yangung hta galaw na hkrum shaga bawngban hpawng e kahtap bawngban na matu naw ra rawng ai lam shi kawn matut tsun ai.

Lai wa sai November 19 ya shani KIA Hpyen Du Shalat Jawng hpe Myen asuya dap ni laknak kaba gap bun ai lam a majaw Balawng, Hkang, Rahkai hte Jawngma Dap ABSDF ni kawn Du Jawngma 23 hkrat sum mat nna marai 20 hkala nba hkrum mat sai re. Dai mabyin ntsa KIA ni lahkawng lang gap ai lam a majaw asuya dap maga na hpyenla 4 hkala mat ai majaw nhtang sadi jaw gap ai lam re nga hpyen dap maga kawn ndau shale da ai.

December 16, 17 ya shani ni hta NCCT gaw Yangung bawngban hpawng lung na ningbaw ni hpe lata san ai lam, mungdan ting gap hkat jahkring hkrang nhprang ntsa kalang bai dinglik yu ai lam hte bawngban hpawng lung na salang ni a ahkang aya ap ya ai lam ni hpe bawngban mat na re lam Dkb. Hkun Uk Ka kawn tsun ai.

Shawng nnan bawngban ai shani MPC maga na Slg. La Mawng Shwi, Slg. Tin Mawng Tan, Dr. Min Zaw U, Slg. Awng Nai U, Slg. Nyu Ung Myin, Slg. Awng Myat Lin ni marai 6 du lung nna NCCT maga kawn Slg. Nai Han Ta, Slg. Badu Koi Htu Win, Dukaba Gun Maw, Dukaba Hkun Uk Ka ni hte hpawn yawng marai 10 jan sa du ma ai.

Posted in: SHIGA