Asuya ahkang n jaw ai majaw Jinghpaw tsin-yam ni hpe garum ntum n sa ai shata 2 na mat

KIO hpyen yen dabang ni de UN garum ntum n du mat ai shata 2 na sai

Myen Mungdan a dingdung daw Jinghpaw Mungdaw hte Lahta Sam Mung ni hta Myen asuya hte amyu sha laknak hpai uhpung ni majan kalang bai kahtap byin bang wa nna shimlam hte asuya a ahkaw ahkang n lu ai majaw dum ntsa sutgan yamnga ni kau tawn da let hpyen hprawng hprawng hkawm nga ai hpyen yen tsin-yam masha ni hpe malu masha ni sa na ahkang n lu ai gaw shata 2 na mat sai lam Mungkan Wunpawng Shinggyim Nauna Garum Madi Shadaw Lam Bawngban Jahkrup Rung (UNOCHA) gaw December 16 ya shani ndau laika shapraw dat ai.

“Jinghpaw Mungdaw asuya hte UN ni shanhte atsawm bawngban jahkrup ai lam galaw nga ai. Raitim anhte sa na n mai byin shi ai. Lawan ladan sa na matu gaw shakut nga ga ai, n sa ai ram ram na sai, September hpang jahtum sa ai. Nshung shang sai re majaw palawng lum ni, dinghku arai ni, malu masha ni hkyak hkyak ra gadawn nga ai” nga Mungkan Wunpawng (UN) kawn tsun shaga ahkang lu ai Slg. Ae Win tsun ai.

UNOCHA a ndau laika hta hpyen yen tsin-yam masha ni hpe garum ntum jaw na ahkang n lu ai lam gaw Myen asuya hte KIA dap ni majan byin nga ai majaw shimlam hte asuya ahkang n jaw ai ngu ai shara hta Bureaucratic jasat zawn bai nai ai lam ni a majaw re ngu shaleng da ai.

Ya yang Wunpawng Mungdan Shanglawt Hpung (KIO) uphkang ginra Laiza hte Manmaw ni hta tsin-yam masha yawng 27,500 hkawt nga shajang nhtawm dai yang e ma kaji ni yawng 12,000 hkawt a matu nba hte palawng lum ni n lu sa ai lam UNOCHA ndau laika hta shaleng da ai.

Ginra kata asuya n re uhpung uhpawng (NGO) hte laga uhpung uhpawng ni kawn hpyen yen tsin-yam masha ni a matu malu masha hte garum madi shadaw ra ai lam ni hpe hkyak hkyak ra gadawn ai shara ni de garum lu hkra mung dahpran nna shakut shaja nga ai lam kapyawn shaleng bang da ai.

September shata hpang jahtum UN garum ntum ni n lu mat ai raitim ginra kata garum madi shadaw la nga ai uhpung uhpawng ni a garum madi shadaw la ai lam a marang ya yang mayak mahkak n nga ai raitim daini a garum ntum ni she n lu yang gaw jamjau jamhkau hkrum wa chye ai nga KIO hpyen yen lakawn lanawn komiti ningbaw Salang Kaba Labang Doi Pyi Sa tsun ai.

“UN garum ntum n lu tim buga ginra kata na NGO ni garum madi shadaw la nga ai majaw ya yang grai yak hkak ai lam gaw n nga ai. Shanhte n garum la yang chyawm yak hkak hkrum wa chye ai” nga tsun ai.

UN uhpung uhpawng ni gaw December praw 3 ya shani Laiza na tsin-yam masha ni hpe sa garum na matu shana da sai raitim Myen asuya ahkang n jaw ai lam a majaw daini du hkra garum ntum lam rai n du lu ai lam shi kawn tsun ai.

Myen asuya dap hte Wunpawng Mundan Shanglawt Hpyen Dap (KIA) lapran kahtap shuk bang wa ai majaw Hpakan maga de mung hpyen yen tsin-yam masha ni jat wa nna garum ntum ra gadawn nga ai lam dabang lit nga ai kawn tsun ai.

Lai wa sai 2012 ning htum maga kawn laning mi jan Jinghpaw hpyen yen tsin-yam masha mun 3 jan a matu shata shagu malu masha hte dinghku lang arung arai ni garum madi shadaw la nga ai kawn shata 2 hkring mat ai lam rai mali ai.

Posted in: SHIGA