Jinghpaw mungdaw Myitkyina ginwang hta nanghpam tsi mawan kaba ai hku dut ginlen nga ai Slg. Marip Gam Awng hpe October 22 ya shana hkying 11 ten e Loi Hkaw kahtawng hta Hkristan nawku hpung Kani Nanghpam Pat Jasan Komiti kawn rim kau sai lam chye lu ai.
Slg. Marip Gam Awng dinghku masha ni gaw Shwi Nyawng Pin mare na rai nhtawm, shi hpe Loi Hkaw kahtawng de sa ai deng 2 gang ai kaw nga ai Slg. Latung Naw a hkau na pa hta kani chyang rawng 10 hte hpawn rim hkrup ai re nga Loi Hkaw nawku hpung pat jasan komiti kawn KNG Jinghpaw Shiga Dap de tsun ai.
Dai wa hpe rai n rim shi yang mung, shamu shamawt ai sat lawat hpe yu nna Loi Hkaw nawku hpung kani nanghpam pat jasan komiti kawn sadi jaw ai lam ni galaw yu sai nga tsun ai.
Slg. Gam Awng hpe rim da ai ten October 23 ya shani Loi Hkaw mare uphkang rung e san jep ai hta “KIA magam gun dingsa re lam.. Laja Yang majan hta gasat lawm yu sai lam, hkum hkrang hkan mung pala ningma hkang hkrai tup re lam” nawku hpung pat jasan komiti kawn jep joi ai mying n tsun mayu wa tsun ai.
Dai majaw shi gaw, ahkyak la sa wa ai lam hta asuya de shalai kau ai lam n galaw ai sha, kanu dap rai nga ai Wunpawng Mungdan Shanglawt Hpyen Dap (KIA) masat 5 dap ba de ap ya na matu hpyi shawn ai nga tsun ai.
Dai wa hte rau kani nanghpam dut mari ai lam hte seng nna Slg. Latung Naw hpe mung matut nna rim ahkyak la mat na re lam chye lu ai.
Jinghpaw ginra kata nanghpam tsi mawan ni dinglai hkra chyam bra nga ai hta asuya uphkang ginra hta sha n ga Wunpawng Mungdan Shanglawt Hpung (KIO) uphkang ginra na magam gun ni hte mung nanghpam tsi mawan hte matut manoi achya ai lam law ai nga pat jasan hpung kawn tsun ai.
Dai majaw ya ten, Jinghpaw amyu sha ni lapran nanghpam tsi mawan kawn lawt kawt wa lu hkra asuya uphkang ginra hte KIO uphkang ginra ni hta hkristan nawku hpung yawng pawng nna nawku hpung shagu hta kani nanghpam pat jasan komiti hpaw ninghtan nhtawm rim ahkyak la ai lam ni galaw nga ai lam nawku hpung ni kawn chye lu ai.
Dai ning laman nanghpam tsi mawan dut mari hpaga galaw ai ni hta sha n ga lu sha jailang ai ni hpe mung rim hkrup ai hta ginra buga masha ni, KIO magam gun ni hte asuya balik makan dap na ni kawn hkawt re lam Myitkyina nawku hpung kani nanghpam pat jasan hpung kawn tsun ai.
Dai zawn makam masham nawku hpung kawn hkrat hkrang hkra ahkyak la sa wa ai lam hta asuya maga kawn pat shingdang ai lam nkau nga ai raitim nawku hpung kata pat jasan lam ni hpe ahkang lu ai made sadi jaw hkrang shapraw sa wa ai re lam chye lu ai.
0 comments:
Post a Comment