Myen asuya hte NCCT myit hkrum lam rai n lu ai daw ni hpe kahtap jahkrup

UNFC ningbaw hte KIO Ningbaw Malai Du Daju Jum Nban La 

Asuya hte myit hkum ai lam rai n lu ai daw ni hpe kalang bai kahtap dinglik yu na matu Mungdan Ting Madang Gap Hkat Jahkring Bawngban Jahkrup Hpung NCCT gaw Htai Mungan, Chaing mare hta October praw 4 ya shani kawn bawngban hpang nga sai lam NCCT Ningbaw Slg. Nai Han Ta tsun ai.

Lai wa sai September 22 kawn 26 ya du hkra Yangung hta 6 lang ngu na Munghpawm Simsa Lam Hkrang Shapraw Komiti (UPWC) hte (NCCT) ni hkrum shaga bawngban ai lam hta myit hkrum ai lam rai n lu la ai dawshan ni hpe kalang bai sawk dinglik yu ai lam rai mali ai.

“Munghpawm hpyendap gawgap sa wa na lam hpe du na mungmasa bawngban hpawng hta bawngban jahkrup mat wa na ngu ai hpe madung dawshan hku nna mi moi kaw na myit hkrum da chyalu rai nga ai. Rai timung ya hte na bat gaw asuya ni n hkapla ai. Ya na hpyendap hta amyu sha bawsang hkum hkra shanglawm taw chyalu re. Dai gaw munghpawm hpyendap re ai nga nna bai tsun bang wa. Anhte maga chyawm shanhte tsun ai hpyendap hpe munghpawm hpyendap hkrang shapraw na matu dai hpe gram lajang na matu ngu ai hpe shanhte n kam hkapla ai masa nga ai. Dai lawnglam ni hpe ladat shaw ai” nga Nai Han Ta kawn Shihtawn ni hpe sanglang dan ai rai nga ai.

Myen asuya maga mungmasa bawngban hpawng hta hkrang amyu mi galai shai wa ai zawn, simsa lam bawngban jahkrup hpawng awngdang lam hpe madung dat ai masa n nga ai lam hpe sawn maram yu nhtawm, Dingda Sam Mung hte Lahta Sam Mung kata Myen asuya a Tatmadaw ni hte amyu sha laknak hpai rawt malan hpung ni lapran majan bai kahtap byin ai lam ni hpe mung sawn maram dinglik yu ai nga matut tsun ai.

Lai wa sai bat laman kawn daini du hkra Karen Amyu Sha Hpung (KNU), Karen Amyu Sha Hpung Simsa Lam Kongsi (KNU-PC), Democracy Akyu Jaw Karen Hpyen Dap (DKBA), Wunpawng Mungdan Shanglawt Hpung (KIO) Dap Ba (4) ginra hta Sam Mung Rawt Jat Pati/ Sam Mung Hpyen Dap (SSPP/SSA) ni hta hpyen masa hku gasat gala wa ai lam ntsa Myen asuya hku nna mungdan ting madang gap hkat jahkring lam a matu galaw nga ai hkrang n re lam Nai Han Ta kawn tsun ai.

“Mabyin yawng gaw hkridun taw nga ai. Dai gaw shi shi majoi byin wa ai lam n re. Mungdan Dap Awn Daju wa mung tsun shaga ai ga grai ja wa ai. Bawngban hpawng hkan mung chye na hkat mai ai masa zawn re ai ni hte jahkrup ai ladat yawm wa ai. Shanhte ra ai hkrang de sha ginlawm wai ai. Hpyen masa mung grau grau byin wa ai zawn re ai ni hpe hkyawm dat yu yang bawngban hpawng masa gaw nau n hkrak ai. Hten mat mai ai masa nga ai. Ga shadawn shanhte ra sharawng ai hkrang hku gangbang wa ai le. N lu yang laba ka-up la na. Lu yang lu.. n lu yang mung hten mat mu ga ngu ai hkrang le” nga matut tsun ai.

Amyu Sha Hpyen Masa Mung Masa Daphpawm (UNFC) hpe mungdan ting gap hkat jahkring bawngban jahkrup lam ntsa jahpai nna n-gun jat ai lam, ganaw shang bang wa ai nga Dap Awn Daju wa dinglun ai lam nga ai nga matut tsun ai.

Mungdan ting gap hkat jahkring na matu myit hkrum lam rai n lu ai daw ni gaw gap hkat jahkring lam hta lahkawng maga dap hte seng ai tarawng tara ni, gap hkat jahkring ngut ai hpang mungmasa bawngban lam rai n du shi yang na hpat-wat ladaw hta dap shara jahkrat lam hte seng ai lam, gasat gala lam ni n byin hkra lahkawng maga ginrun yu reng komiti ni hpawng shabawn na lam, amyu sha laknak hpai rawt malan hpung ni hpyenla n lahkawn na lam, gap hkat jahkring ga sadi hta lakmat htu lawm na salang ni hpe lata san na lam hte mungmasa bawngban hpawng hta shanglawm ra na hpaw shabawn hpung ni matut bawngban na lam ni naw ngam ai lam rai nga ai.

Dai hpang dap hte seng ai lam ni hpe mungmasa bawngban ai lam hta gabaw langai hku nna bawngban na matu amyu sha rawt malan hpung ni maga na numshawn hpe mung asuya maga n hkapla la ai sha mungmasa bawngban lam rai n galaw shi yang bawngban nna asuya hte gumhpawn da na masa pru wa ai majaw myit hkrum ai lam n lu la ai zawn, NCCT a mungmasa bawngban ai lam hta ‘masum-brum’ bawngban na matu numshawn hpe mung asuya gaw ‘manga-chyawm’ bawngban na matu tsun wa ai lam hpe mung myit hkrum ai lam n lu la ai.

Mungmasa bawngban ai ladaw laman amyu sha laknak hpai rawt malan hpung ni n-gun n jat bang na lam, hpyenla nnan n lahkawn na lam tsun wa ai hpe mung n hkapla ai sha alak mi masat jahkrat kau ai masa sha rai nna myit hkrum ai lam n lu la ai lam chye lu ai.

NCCT gaw mungmasa bawngban ai hkrumra hpawng kawn lu la ai bawngban malu ni hpe rapdaw de tang madun nhtawm shagrin ya na matu tang madun timung “mungmasa manghkang hpe hparan ai shaloi rapdaw a shinggan kaw rai ra ai. Rapdaw a shinggan kaw dawdan da ai hpe rapdaw hpe hkungga ai hku nna rapdaw de tang madun ai le. Rapdaw kawn bai jep joi na ngu ai gaw rapdaw hku na kalang bai magra kau na ngu ai masa wa pru mat ai” nga tsun ai.

Lai wa sai hkrum shaga bawngban hpawng hta mung hpyendap dat kasa ni gaw NCCT a tang shawn wa ai lam ni hpe bai jahkrup ai lam n nga ai sha ntsa de tang madun na nga nna sha tsun wa ai lam mung mungdan ting gap hkat jahkring lam ntsa hpyendap a sat lawat hpe kalang bai shawn yu shara byin taw ai nga Nai Han Ta kawn tsun wa ai.

“Masa lam n htuk ai. Ndai gaw shawoi na mabyin zawn sha kun. N rai yang dasang shabyin dat ai masa kun ngu ai hpe ram ram myit yu ra ai. Majan gaw grau byin wa ai. Ndai lam yawng hpe hkyawm dat yu yang hpyendap kawn gap hkat jahkrit lam ntsa shanhte maga shawng laba ka-up da nhtawm hkapla na ngu ai masa de yawng taw ai kun, myit yu hpa tai wa ai” nga tsun ai.

Lai wa sai September shata na gap hkat jahkring bawngban hpawng hta alak mi myit hkrum ai lam n lu la nna bai kahtap hkrum shaga bawngban na lam hpe sha myit hkrum da ai rai malu ai.

NCCT uhpung ni a bawngban hpawng hta Hkang Amyu Sha Dap (CNF), Kukang Uhpung, Balawng (Ta-ang) Amyu Sha Shanglawt Dap hte Rahkai Shawnglawt Pati (ALP) ni kawn dat kasa ni n lu sa du ai lam chye lu ai.

Posted in: SHIGA