 |
| Je Yang dabang hpyen masha ni |
Jinghpaw Mungdaw kata Wunpawng Mungdan Shanglawt Hpyen Dap (KIA) hte asuya dap lapran lahkawng maga chya hkat nga ai manghkang ni yawm wa nna zim wa sai ngu mai tsun tim tsim-yam masha ni dum nta de bai nhtang wa mai na daram myit mada shara n nga shi ai lam tsin-yam lakawn lanawn ni tsun ai.
Hpyen masa gaw shaning baw kawn dingyang gasat gala byin ai hta ginrun Manghkang Hparan Masit Komiti hpaw ninghtan nhtawm hkrum shaga bawngban hpawng ni galaw wa ai hpang, ya ten du hkra majan zim wa nna simsa wa ai nga Simsa Lam Akyu Galaw Hpung PCG kawn maram nga ma ai.
Dai maram ai lam ni hpe, Wunpawng Mungdan Shanglawt Hpung (KIO) uphkang ginra kata shingbyi nga ai mare buga masha ni chyawm mu mada ai lam n nga ai raitim, Jinghpaw Mungdaw Asuya maga kawn shanhte uphkang ginra kata na tsin-yam masha nkau hpe dum nta nhtang wa na matu shadut ai lam ni, mahkrun hpaw ya ai lam ni galaw nga ai lam KIO Lakawn Lanawn Hpung kawn Ningbaw Salang Kaba Doi Pi Sa tsun ai.
“Jinghpaw Mungdaw Hkringmang Daju. Ngan Seng Manmaw ginwang Loije du ai shaloi Loije hpyen yen ni hpe shi tsun ai hta wa mayu yang..wa mayu ai lam tang madun wa marit nga ai majaw dai hku tang madun ai ga rai nga. Dai hku nga yang hpyen yen ni gaw tinang shara de wa mayu ai nga yang laika tang dat mu nga nna shanhte laika tang dat ai. Ndai Sinlum Kaba maga nga yang kahtawng 3 ram gaw jahpan jaw kau dat ai nga reng ai. Asuya maga chyawm bai nhtang nga shangun ai ga rai nga ai. Kahtawng masha ni hku na gaw shim lam nau n nga ai ni, hpa ni tang da ma ai da.”
Lahkawng maga bawngban jahkrup ai lam hta mahtai kaja langai mung n lu shi ai a ten KIO uphkang ginra maga na tsin-yam ni dum nta wa na matu mahkrun n mu ai zawn asuya ahkang jaw ai majaw tinang buga nhtang wa na mare masha ni a matu mung hkrit tsang shara nga ai lam Slgkb. Doi Pi Sa matut tsun ai.
“Asuya maga kawn wa shangun tim nkau gaw KIO hte asuya bawngban jahkrup ai lam hta kaja wa nan kam mai na zawn re n nga ai majaw anhte chyawm wa na matu kalang dat hte n lu dawdan ai lam kahtap tang madun ai nga na da ai.”
Dai hpang Jinghpaw Wunpawng ginra kata hkristan nawku hpung ni hkan shingbyi nga ai tsin-yam ni mung dum nta nhtang wa na matu myit mada nga ai raitim, ya ten rai n mai shi ai lam tsin-yam masha ni tsun ai.
Tsin-yam masha ni gaw Jinghpaw ginra kata na asuya hpyen dap ni bai dawm mat nhtawm simsa lam gawgap na masa hpe la nga nna ‘wa na, n wa na’ hpe dawdan lu na re lam tsin-yam dabang lit nga ai ni kawn chye lu ai.
Ya yang hta madung ahkyak dik gaw, tsin-yam dabang hkan shingbyi nga ai buga masha ni a matu dum nta sha n mai wa ding sa ra gadawn ai mayak mahkak ni hpe garum shingtau hkat na ahkyak ai lam Mai Ja Yang tsin-yam dabang hpe gawnhkang nga ai Wunpawng Ning Htoi (WPN) hpung kawn lit hkam Jan. Mary Tawm tsun ai.
“Ndai tsin-yam masha ni mung, ya nga yang dabang kata nga ai 3 ning jan wa sai majaw ya rawng ai ginsum ni gaw hpang na ladaw hta hkam lu na n rai sai. Hpa na nga yang ningnan galaw ai kawn hkringhkra ginsum nga yang.. tunghtat-ta pa ni mung shaning baw 3 jan wa ai majaw tsam wa ai ni nga ai le i. Ya tsang ai gaw nshung shang wa yang katsi dam hpe hkam lu na mung naw ra ai le i. Dai zawn yak ai lam ni nga ai. Dai majaw hpa mi rai rai myit dum ya na matu le ndai tsin-yam sen mi jan hpe.”
Asuya hte KIO lapran simsa lam a matu lahkawng maga na dat kasa ni hkrum shaga bawngban ai lam galaw nga ai majaw majan nhpan ni yawm mat ai ngu mai tsun ai raitim, Jinghapw Mungdaw kata na asuya dap ni gaw dawm mat wa ai lam n nga, shara la nga dingyang re lam chye lu ai.
Mungdan ting gap hkat jahkring hkrang nhprang a matu asuya Simsa Lam Hkrang Shapraw Komiti UPWC hte Mungdan Ting Madang Gap Hkat Jahkring Bawngban Jahkrup Hpung NCCT lapran September 22 kawn 26 ya du hkra hkrum shaga bawngban ai lam hta mung dap hte seng nna bawngban ai lam hta asuya hte hkrum ai lam n lu shi ai hpe chye lu ai.
Hkrum shaga bawngban ai lam galaw ai raitim, myit hkrum ai lam n lu ai hta sha n ga gap hkat jahkring ga sadi lakmat htu na n mai byin shi ai lam mung NCCT Ningtau Ningbaw Badu Koi Htu Win tsun ai.
0 comments:
Post a Comment