 |
| Lahta Sam mung Muse makau Pangsai e mu lu ai KA a kani nanghpam ninghkap pyendau |
Kani nanghpam tsi mawan manghkang grau sawng wa shangun ai Myen asuya a zai ladat “katsi majan” ngu ai ndau shabra laika hpe Htai Mungdan Chaing Mai daju Jinghpaw Wunpawng Amyu Shayi Hpung (KWAT) gaw October praw 8 ya shani ndau shale dat sai.
2012 kawn 2014 ning shaning baw du hkra lahkawng ning jan Jinghpaw Mungdaw hte Lahta Sam Mung ginwang 8 kawn kani nanghpam lu sha ai ni hte shanhte a dinghku masha ni, nanghpam dut ginlen ai ni, nawku hpung ni, mare myit-su salang ni hte KIO pat jasan komiti ni hpe KWAT kawn hkum shaga san ai lam daw;75 galaw nhtawm ndau shabra laika le wa ai lam rai nga ai.
“Anhte ni hpe gumwai hku na jahten nga ai ngu ai masa le. Asuya ni ahkaw ahkang jaw da ai jarit sin dap, shimlam dap ni hpe kani hkai na ahkang jaw da ai le i. Shanhte hku nna mung wanglu wanglang hkai nna galaw nga ma ai.”
Maga mi hta mung, majan byin nga ai aten rai yang Myen hpyendap nga ai shara hkan kani yi galaw sha ahkang jaw nna shawa masha ni hku na kani yi galaw ahkang ahkun hkanse hkan hta hkawm nga ai ni hpe mung anhte hpung ni mu ai” nga KWAT kawn Jan. Shirley Seng tsun ai.
Shawa masha ni hpe san yu yang nanghpam tsi mawan gaw mungmasha ni hpe gumwai ladat hte Jinghpaw amyu sha ni hpe sat nga ai ngu ai nsen ni na taw nga ai majaw shawa a nsen hpe mahta nna ndai ndau shabra laika shale dat ai lam re nga matut tsun ai.
Chi Hpwi hte Waimaw ginwang amyu sha rapdaw dat kasa Slg. Zahkung Ting Ying a Jarit Sin Dap ni uphkang nga ai shara hta madung kani hkai nga nhtawm Lahta Sam Mung kaw mung Myen asuya dap hte Pyitutsit uhpung (13) ni uphkang nga ai ginra ni hta kani hkai shatut ai lam law nga nna, dai pyitutsit uhpung (4) na ningbaw ni gaw Sam amyu sha rapdaw dat kasa ni re nga tsun ai.
Dai hte maren 2011 ning Myen asuya hte Wunpawng Mungdan Shanglawt Hpyen Dap (KIA) ni majan byin wa ai hpang KIA hpe gasat na matu Myen asuya a Pyitutsit ni hpe kani hkai ai lam hte kani hpraw hta sha n ga laga nanghpam tsi mawan gin shapraw ai lam ni hpe ahkaw ahkang jaw da ai masa a majaw rai nhtawm, asuya dap hte shanhte kaw hkyawm ai uhpung uhpawng ni mung Jinghpaw ginra kata e nanghpam tsi mawan shapraw ai lam ni grau grau law htam wa ai nga ndau shabra laika hta shaleng da ai.
Kani yi ni hpe asuya npu na pyitutsit ni uphkang ai ginra hkan hkai shatut nga ai rai nna pyitutsit hte asuya daru magam manat ai ni ahkun hkanse hta nga ai raitim, mare masha ni gaw majan a marang kaga hkai nmai hkai na lam hte gat lawk de dut mari na matu dingbai dingna mayak mahkak ni nga ai lam shalawm da ai.
Asuya hku nna amyu sha laknak hpai rawt malan hpung ni hpe laknak jahkrat shangun ai n re sha mungmasa ladat hte hparan nna mungmasha ni a nga mu nga mai lam hpe lawan ladan hparan sa wa shangun mayu ai lam Jan. Shirley Seng kawn tsun ai.
“Nanghpam tsi mawan gasat shamyit taw nga ai. Hkai shatut dut mari ai lam ni grau law wa ai. Maga mi de gasat gala nga ai zawn shala nna ndai majan byin nga ai ten hta mungshawa ni tamlu tamsha na matu mayak mahkak law law hkum nga ai ten ndai kani galaw nna she kan bau nga ai ngu ai zawn byin wa ai” nga tsun ai.
Myitkyina, Manmaw, Lashu mare grupyin hta mung kani hpraw gaw kani chyang hta manu grau hkyamsa ai majaw ramma ni a lapran kani hpraw lu sha ai lam ni grau law htam wa nhtawm Myitkyina, Manmaw dakkasu jawngma sumpum masum hta na sumpum mi ram gaw kani hpaw sai lam hta htu bang nga ai ni hkrai re nga tsun ai.
Hpakan Lungseng Maw hta mung bungli galaw ai masha tsa htam shadang 90 gaw nanghpam tsi mawan lu sha ai ni kai rai nna Miwa ga jarit mayan hta mung kani hpraw hta lai nna Yama tsi hkyep lu sha ai lam ni grau law jat wa ai lam chye lu ai.
Myen asuya hku nna kani nanghpam pat jasan masing hpe asharawng ashara galaw na matu myit n lawm ai lam hte mayun kum hpa sha ai lam ni law wa nhtawm nanghpam tsi mawan dut ginlen ai lam hpe tara masan hte hkrak ja ja pat shingdang ai lam n nga ai sha nanghpam tsi mawan kaji kajaw sha dut mari ai ni hte lu sha ni hpe rai yang ten galu htawng dam ni jahkrat nga ai nga tsun ai.
Dai majaw KIO hku nna mung 2014 ning kawn kani nanghpam pat jasan masing galaw sa wa na matu dawdan nhtawm nanghpam tsi mawan masu hkalem dut ai lam law wa nna mare kaba hkan Jinghpaw Wunpawng nawku hpung ni woi awn let nanghpam tsi mawan ninghkap masing ni galaw nga ai nga Jan. Shirley Seng kawn tsun ai.
Mungkan Wunpawng nanghpam tsi mawan gawnhkang hpung (UNODC) hta Chi Hpwi ginra kata kani hkai ai lam grai tsang ra ai shara hku masat ai lam n nga ai sha, Jinghpaw Mungdaw Waimaw hte Danai ginra kata kaw sha grai tsang ra ai shara hku masat da ai lam gaw laklai taw nhtawm 2012 ning kawn kani hkai ai lam tsa htam shadang 10 yawm mat ai nga UNODC a tawt maram ai lam ntsa ntsen hpa re nga ndau laika hta lawm nga ai.
Mungdan gadaga hte arang madu ni hpe mung manghkang ni yawm wa hkra mungmasa hku nna hkrum shaga bawngban mahtai jawm tam nga ai zawn, Myen mungdan na nanghpam tsi mawan manghkang hpe mung alak mi ahkyak shatai hparan jasan ya na matu shadut da ai.
Dai hpang, Mungdan gadaga garum ntum ni hpe mung nanghpam tsi mawan manghkang hpe grau kaba wa shangun ai Myen asuya a myu sha laknak hpai rawt malan hpung ni hpe shamyit ai ladat hpe madung azi yu ai lam n nga ai hpe jahpoi kau dat ai. Seng ang ai daru magam manat ai ni, uhpung uhpawng ni hku nna mung nanghpam tsi mawan manghkang hpe hparan na matu ahkyak dik lamyan langai hku nna madung dat galaw sa wa na matu KWAT kawn hpyi shawn dat ai.
0 comments:
Post a Comment