Num sha ma hpe roi rip ai Myen hpyenla a amu hpe no.2 lang rung dung jep joi

Lahta Sam mung Munggu ginra shawnglam hkawm nga ai Myen hpyenla lahkawng

Lahta Sam Mung, Kuthkai ginwang Namgut mare kawn asak rai n hpring shi ai num sha ma langai hpe roi rip ai manghkang hte rung shawk hkum ai asuya hpyen dap kawn hpyenma Kawng Bu Bu manghkang tara hkam sakse marai lahkawng hpe October praw 2 ya shani Muse ginwang tara rung hta nambat lahkawng lang ngu na rung dung jep joi ai rai nga ai.

Tara hkam Hpm. Kawng Bu Bu a sakse hku nna Kuthkai myu-ne Dr. Win Win Myai hte shi manam lai wa ai nta madu ni hpe mung jep joi mat ai nga rung shawk maga kawn tara kasa Jan. Roi Ja tsun ai.

“Sarawun gaw shi jep sawk mu ai lam ni hpe tang shawn ai. Num sha ma a sakse kata labu arai ni hpe shi tsi rung kaw sha jep ai n re. Jak tsi gawk hta mung yawng sa nna jep ai. Nta madu gaw hpyenla marai 3 sa manam ai. Rai timung gara hpyenla re hpe n lu matsing sai nga ai majaw sha matsing sumhting da ai” nga rung shawk tara kasa Jan. Roi Ja kawn tsun ai.

Lai wa sai September 24 ya shani hta tara hkam san san marai 2 hpe jep joi na matu htet shaga dat ai rai tim tara rung de du wa ai lam n nga ai majaw October praw 2 ya hta jep joi ai lam rai nga ai.

Shanhte hpe mara hte seng ai daw; 276 (roi rip lam) hte myit n hkrum ai sha lagu ganawn mazum lam daw; 363 ni hte tara jawat da ai rai nna September 19 ya shani shawng ningnan lang rung dung ai shaloi num sha ma a kanu kawa ni hte mare salang ni hpe mung jep joi masai re.

Lai wa sai May 16 ya hta rudi Hk.M.Y Masat 567 kawn Hpm. Kawng Bu Bu gaw num sha ma gat sa mari nna nta wa ai lam kaw shara mi hte shaga mat nna roi rip hkrum ai majaw num sha ma a kanu kawa ni gaw Sam Mung Jinghpaw Lai Laika hte Htung Hkying Amyu Sayi Hpung de sa garum hpyi nna rung shawk da ai rai nga ai.

Tara hkam Kawng Bu Bu hpe hpyen tara rung kawn tara tawt lai ai lam hte htawng dam laning mi jahkrat ai re. Rai tim, Sam Mungdaw Jinghpaw laili laika hte htung hkying amyu shayi hpung kawn mungchying tara rung de shalai ya na lam kahtap hpyi shawn wa ai majaw ya ten 2 lang ngu na rung dung jep joi ai lam rai nga ai.

Du na October 10 ya shani hta rung bai kahtap dung na masat dat ai.

Amyu shayi ni a prat shim lam hte amyu shayi ni makawp maga lam lu wa na matu ya na zawn mungchying tara rung hta kahtap nna tara jawat ai lam re nga kade n na ten sha Sam Mungdaw Jinghpaw laili laika hte htung hkying amyu shayi hpung kawn Shingtau Amu Madu (1) Jan. Zadawng Lum Nyoi kawn tsun mat ai rai nga ai.

Posted in: SHIGA