Hpakan KIA Dap 6 hte Myen asuya dap lapran, kahtap shuk wa dingyang

KIA Dap 6 hpyenla lahkawng, Hpakan Uru Sengmaw, Jinghpaw Mungdaw

Wunpawng Mungdan Shanglawt Hpyen Dap (KIA) Dap Ba (2) npu Dap Dung (6) hte Myen asuya Dapnu Masat (66) dap ni lapran hpyen masa shuk wa ai majaw Awng Ba Li kahtawng na hpaji jawng ni gan pat da sai nga KIA Dung Dung (6) na Dap Up Dukaba Tang San tsun ai.

Dapnu 66 maga kawn KIA Dung 6 ni dap jung nga ai shara hpe October 17 ya shani mung hkying 11 ten du hkra n yen ya yang gap na re nga kahtap shana wa ai majaw hpyen masa jin jin hkyen maren tawn ai nga Dkb. Tang San tsun ai.

“Dai hpawt hkying 11:00 hta mahtai jaw, n htingnut yang gap na nga mani Myen asuya dapnu 66 ni tsun ai. Rai timung shanhte chyawm n lung wa shi ai. Myen asuya gaw anhte hpe sadi jaw da ai nga yang anhte mung sadi maja nna la nga ai” nga shi kawn tsun ai.

KIA Dap Dung 6 shara kawn October 14 ya shana daw hkying 6:00 ten jahtum tawn yen ya na matu Myen asuya dapnu 66 npu Hk.L.Y Masat (1) Dap Dung Up Dukaba Chyaw Zeya kawn Awng Ba Li kahtawng lawk salang ni hku nna shana wa ai zawn, October 15 hte 16 ya shani ni hta mung yen htingnut ya na matu kahtap sadi jaw tsun mat ai lam rai mali ai.

Shingrai, dai kahtawng masha ni gaw ni-nawn ai ginra de hprawng yen mayu ai rai tim Myen asuya dapnu 66 kawn pat shingdang da ai majaw hkrit tsang nga ai lam Dkb. Tang San tsun ai.

“Anhte gaw majan byin wa ai majaw mare masha ni hpe Hpakan maga na IDP hpyen yen dabang ni de htawt mat na matu tsun da ai hpe Myen asuya dap ni n le shangun ai. Mare masha ni gaw n lu pru wa nna ayak ahkak hkrum nga ai” nga matut tsun ai.

Awng Ba Li mare kawn lapran tsang jawng hte Ginsi Hkaw mare na ma shalet jawng ni hpe mung 3 ya pat da sai re lam tsun ai. Awng Ba Li mare hta kahtawng masha 1,000 jan shanu nga nna shanhte a simlam a matu tsang nga ai nga matut tsun ai.

Majan laja wa na zawn re masa nga ai majaw Awng Ba Li ginra masha marai 100 jan gaw Lawng Hkang hkalup nawku hpung hta tsin-yam masha hku na shingbyi taw nga sai lam sa tau la ai ni kawn chye lu ai.

KIA maga kawn dai dap kawn htingnut ya na masing n nga ai lam shanglawt ni tsun da ai.

Awng Ba Li mare gaw asuya dapnu 66 npu Hk.L.Y Masat (1) Dap Dung hte KIA Dap Dung (6) lapran chyat rawng taw ai nga Dukaba tsun ai. Lai wa sai 2012 ning htum wa maga Hpakan ginwang kata asuya hte Shanglawt ni majan byin ai majaw hpyen yen tsin-yam masha tsawm-ra mi hprawng yen ra mat ai rai nga ai.

Posted in: SHIGA