 |
| KNU ningbaw Mutu Say Poe |
Amyu Sha Hpyen Masa Mungmasa Daphpawm (UNFC) hpung kawn Kayin Amyu Sha Hpung (KNU) le wa ai lam hpe matut hkangzing mat na lam hpe 6 ya tup galaw ai ginjaw dinggrin komiti zuphpawng kawn dawdan dat ai.
October 23 ya kawn 29 ya du hkra ginjaw dinggrin komiti a 3 lang ngu na hkyak hkyak zuphpawng galaw ngut ai hpang lawnglam 6 hpe myit hkrum dawdan nhtawm ndau shale ai dat lam rai nga ai.
“Anhte ni gaw daphpawm magam bungli hte seng nna galoi mung shamu shamawt lawm nga ai re. Shai hkat ai lam ni nga ai she re. Jahkrup mat wa nna amyu sha laknak hpai rawt malan uhpung uhpawng ni myit hkrum mangrum lam hpe gaw dingyang lata gindun sa mat wa na re” nga KNU ginjaw dinggrin komiti malawm Badu Awng Maw Ae kawn tsun ai.
KNU gaw UNFC hte pawng hpawm ai lam hte seng nna KNU ginjaw komiti malawm ni kawn sung sung li li bawngban maram yu nhtawm hkring hkra gan jahkring da sana rai nga ai. Hkring hkra gan le nga ai ladaw laman UNFC hpung hte matut jahkrup sa wa let ra rawng ai hta hkan nna amyu sha laknak hpai uhpung langai hkai hte mi rai rai, hpaw shabawn uhpung hte mi rai rai amyu sha bawsang ni a mungmasa bandung hkrang shapraw sa wa na lam hpe jawm galaw mat wa na re” nga ndau shabra laika hta madun da ai.
UNFC hpung shang hku nna gan hkring ai lam hpe matut hkangzing mat na nga dawdan ai lam ntsa KNU hku nna laga amyu sha laknak hpai uhpung uhpawng hte ta-tut jawm galaw sa wa shangun mayu ai lam UNFC a Shingtaw Amu Madu (1) Dukaba Hkun Uk Ka kawn tsun ai.
“Shanhte maga na ta-tut bungli ni hta matut nna jawm kapyawn galaw mat na rai yang gaw sum machyi ai lam laga n nga ai. Amyu sha ni yawng jawm galaw ra ai shara hta sadi sahka rai matut shanglawm lu ai rai yang mying gaw ahkyak madung n re. Ta-tut magam bungli ni hta shanglawm gun hpai ai rai yang yawng hkap la lu ai masa nga ai. Dai majaw ya na zawn dawdan ai hpe mung anhte chye na hkawn hkrang ga ai” nga tsun ai.
Lai wa sai September praw 1 ya shani KNU gaw UNFC hpung shang uhpawng kawn hkring hkra le wa nhtawm matut nna bai shanglawm na n shanglawm lam hpe ginjaw komiti zuphpawng hta bawngban jahkrup yu sai raitim matut nna mung hkring hkra gan le nga na hpe sha dawdan mat ai rai malu ai.
Dai zawn komiti zuphpawng hta KNU kawn ga garan mat ai Kayin laknak hpai uhpung uhpawng ni hpe kalang bai zinlum na matu 15 lang ngu na congress hta masat jahkrat da ai “Kayin laknak hpai uhpung uhpawng ni kalang bai myit hkrum mangrum lam komiti” kawn woi awn nna matut hkrang shapraw sa wa na matu dawdan da sai nga ndau laika hta shaleng da ai.
Dai komiti hpe KNU a mungmasa woi awn ai npu hta Kayin laknak hpai uhpung ni hpung langai kaw sha kalang bai hkyawm nna hpaw shabawn wa na lam snr Kawtu-le hpyen dap (KAF) hpaw shabawn na lam hte seng nna masa hku hkap la nhtawm du na 2016 ning hta galaw na 16 lang ngu na congress hta matut nna hkrang shapraw sa wa na matu dawdan ma ai.
KNU a 15 lang ngu na congress galaw ngut ai hpang 3 lang ngu na dinggrin komiti a madung tawn ai zuphpawng hta komiti malawm marai 47 sa du bawngban lawm nna ya yang na mungmasa mabyin masa, tinang uhpung uhpawng a mabyin masa ni, daphpawm hte seng ai mabyin masa ni hpe brang brang lang lang bawngban jahkrup mat ai nga chye lu ai.
0 comments:
Post a Comment