 |
| Oct-8-2014 ya shani Hugawng Mare masha ni Yuzana company hpe n ra sharawng ai lam, me jaw nga yang |
Jinghpaw Mungdaw, Hpakan ginwang Hugawng Pa ginra hta Yuzana Company a majaw htawt sit shara jahkrat hkrum ai dabang Tsan Pya mare kawn Mare Salang Slg. Ah Hpu Dwi hpe Hpakan ginwang tara rung Ningtau Uphkang Du Slg. Chyaw Myin hku nna bungli lit kawn hkring na matu tsun nhtawm October praw 9 ya shani gaw nam nga shu shan hte shingra maling mala makawp maga lam hte shingra maka ginra gawnhkang lam tara daw; 36 (c) hte maren amu hpaw ahkyak la rim kau sai lam chye lu ai.
Tsan Pya mare Lawk Salang Slg. Ah Hpu Dwi hpe bungli lit kawn hkring na matu tsun wa sai raitim mare masha ni n hkap la ai majaw matut gunhpai nga nna Danai Hugawng Pa ginra hta Yuzana company a manu mana maden la ai lam hpe ‘ra/n ra myit-ra me’ hta shinggyin ai lam galaw ai hpang shani jang rim mat ai re lam dinghku masha ni kawn chye lu ai.
Shanhte October praw 9 ya shani shana daw hkying 3:00 ten, Kamai balik dap kawn rim kau dat ai rai nna October 10 ya shani e Hpakan hkyuk de sa da sai re lam Kamai Balik Dap kawn tsun shateng ai.
Kamai Balik Dap kawn lit nga ai wa gaw; “shingra maling mala shalawt tata daw; 36 (c) hte rim ai rai nga ai” nga Jinghpaw Shiga Dap de tsun ai.
Tsan Pya mare hta Yuzana company kawn hpaji jawng ni atsawm gap da ya ai raitim sara/sara num ni nga na ginra nta ra gadawn ai mayak a marang jawng komiti ni, mare myitsu salang ni yawng myit hkrum ai lam hte lamu ga htingra ni kum dut nhtawm alu tam let ginra nta 2 galaw ai lam re nga mare masha ni kawn chye lu ai.
Dai lam hte seng nna Tsan Pya mare na Slg. Lamung Ta Gun hte Slg. Ah Hpu Dwi hpe Kamai balik dap de htet shaga rim mat ai lam rai nna mare masha ni hku nna Kamai balik dap de hkan mat ai hta “nam kawn dap kawn shawk da nna, shawk da ai majaw she rim da ai re.. mara hkum-mu mu. Sit dawng katawt n ju n dawng myit ni hkum rawng mu, anhte gaw lahta na matsun hte maren rim ai she re” nga tsun ai lam hkan nang lawm ai Tsan Pya mare na Slg. Tin Mawng Shwi tsun ai.
Dai zawn rim hkrum ai lam ntsa dinghku masha ni hku nna Wa Ra Zup lawk Salang ni hte seng ang ai namkawn makan dap ni de ahkyak la ya na matu amyu myu dip n-gun jaw ai lam a majaw dai zawn rim hkrum ai lam mai byin ai nna, Kawa hpe tsang nga ai lam Slg. Ah Hpu Dwi a kasha Shayi. Yawhte Sa kawn Jinghpaw Shiga Dap de tsun ai.
“Shanhte gara hku maw lanyet ai kun n chye sai. Anhte gaw yi sha hkyen sha ai nga yang, yi mung grai tsan ai. Htaw sa le sa lam hkan lama ma byin na mung tsang ai. Ah Wa na asak mung tsang ra na re. Ndai lapran ah wa lama ma byin na tsang ai.. grai nan tsang ai. Ah Wa na asak wa shanhte kaw she madung ai zawn byin taw ai”
Lai wa sai October praw 4 ya shani mung Tsan Pya mare na lamu ga la da ai ni hpe Wa Ra Zup lawk Salang kawn shanhte hpe zuphpawng shaga ai hta marai 4 lung ai ten Tsan Pya mare salang wa hpe n ra sharawng ai lam tsun garu ai lam ni nga ai nga chye lu ai.
Tsan Pya mare salang gaw shi hpe rim sharen da hkrum ai ten mare salang ningnan hpe lata san na matu shi nan htet kau da ai nga nna mung mare masha ni tsun nga ai.
Hugawng Pa ginra hta Yuzana company a manu mana kaba ai bungli masing maden ai lam a majaw ginra masha ni a lamu ga ni sum mat nna mare masha 1,000 mi jan hpe 2009-2010 ning kawn htawt sit shara jahkrat dabang Tsan Pya mare de htawt kau dat ai rai nga ai. Tsan Pya mare Mare Slang Slg. Ah Hpu Dwi hpe gaw 2013 ning kawn mare salang hku nna shatsam hkum ai lam mung rai nna kahtawng masha ni ra sharawng ai wa mung re lam chye lu ai.
Yuzana company ra/n ra hte seng nna Hugawng Pa na chyauman masha ni shawa myit-ra hkamla ai lamang galaw yang mung 98 tsa htam shadang gaw n ra sharawng ai lam mahtai wa pru ai nga mare masha ni tsun ai.
0 comments:
Post a Comment