KIO woi awn ai Laiza amyusha laknak hpai hpung zuphpawng kaba galaw sana

KIO Ningbaw Malai Nban La Awng.

 

Asuya hte Wunpawng Mungdan Shanglawt Hpung (KIO) lapran bawngban hpawng hta myit hkrum da ai hte maren KIO woi awn nna amyusha laknak hpai hpung ningbaw ningla ni shanglawm ai mungdan ting dang gap hkat jahkring lam hpe ndai October shata htum (28-30) ya lapran Ginjaw Laiza Muklum hta galaw sa mat na re lam chye lu ai.

Shingrai KIO woi awn galaw na bawngban hpawng hte seng nna simsa lam jahta ningbaw Sara Kaba Sumlut Gam KNG Jinghpaw Shiga Dap de tsun ai.

“Amyu sha laknak hpai hpung ni asuya hte bawngban jahkrup sa wa ten KIO gara hku shanglawm na, laknak hpai wuhpung ni hte myit hkrum let bawgban nna ya asuya shaga nga ai mungdan ting shadang ta masat ka na gabaw a npu kaw bawngban mat na, yawng a ningmu shanglang htailai hkat na rai nga ai.”

Bawngban hpawng hta amyusha hpyen masa mungmasa daphpawm (UNFC) ni hte hpung shang masha n re ai “Wa” dap hpung ni hte laga dap hpung ni mung shanglawm na re lam chye lu ai.

October shata (8, 9, 10) ya lapran Myitkyina myu hta galaw ai asuya munghpawm simsa lam hkrang shapraw komiti hte KIO ni a bawngban hpawng hta gap hkat jahkring ta masat ka ai hpawng de Wunpawng Mungdan Shanglawt Hpung (KIO) zuphpawng lung na n lung na hpe rai n shana yang amyu sha laknak hpai hpung ni hte shawng bawngban hpawng langai galaw lu na matu hpyi shawn ai ten asuya maga kawn myit hkrum ya ai lam rai nga ai.

Wunpawng Mungdan Shanglawt Hpung (KIO) gaw lai wa sai October (18) ya shani ginjaw Laiza Muklum hta mungshawa sanglang hpawng langai galaw nna bawngban hpawng a mahtai ni hpe hpaw hpyan dan ma ai.

www.kachinnews.com

www.burmese.kachinnews.com

www.kahcin.kachinnews.com

www.kachin-news.blogspot.com

http://www.facebook.com/Kachin-News-Group

Posted in: SHIGA