Wunpawng Mungdan Shanglawt Hpung (KIO) woi awn ai amyu sha laknak hpai hpung n’tsa tsang salang ni Ginjaw Laiza Muklum hta bawngban hpawng galaw na hkyen lajang nga ten asuya dap maga kawn KIA dap ni de shing shing rai hpyen n-gun jat bang wa ai lam chye lu ai.
Ginjaw Laiza shawnglam ginra hkan asuya dap gaw October (27) bat Laban Ya shani Manmaw maga kawn hpyen n-gun (200) jan hpe mawdaw (8) hte Dawhpumyang kawn Shadan Pa, Hka Ya shawnglam dap ni de n-gun jat bang da ai lam KIA shawnglam shiga lawk kawn chye lu ai.
Dai zawn Wunpawng Mungdan Shanglawt Hpyen Dap (KIA)Masat (4) Dap Ba Lahta Sam Mung de mung Lashu maga kawn hpyen mawdaw (6) n-gun (150) daram October (26) bat Kru Ya shani KIA Dap Dung (8) ginra Nam Tsalin hte Man Loi lapran n-gun jat bang da ai lam Ba (4) salang ni tsun ai.
Dai shana de sha Lashu kawn hpyen mawdaw (6) hte KIA Dung (8) ginra Sinli (Ting Ni) hta kahtap nna jat bang da ai lam chye lu ai.
KIA Dap Ba (3) Dap Dung (12) Saga Nam Hkum hta htu lung shamu shamawt nga ai asuya dap Ts.Hk.K Masat (21) npu zai ladat hpyen hpung (2) hpe KIA maga kawn wang da ai majaw asuya dap kawn hpyen n-gun matut jat bang na masa nga ai lam tsun ai.
Dai dap kawn Laban Ya shana daw hkying (3:00) daram hta lu sha kyet mat ai majaw laknak kata hkum kaman hprawng wa ai Agyi Ko Nu hpe KIA Dung (12) kawn hkangzing da ai lam KIA Dung Up Dkb. Labang Jawn Awng KNG Jinghpaw Shiga Dap de tsun ai.
“Asuya dap zai ladat (2) hpe anhte wang da ai. Daini hte rai yang (6) ya na sai. Malu masha ni gadawn nga sai. Dai ni asuya dap kawn hpyen n-gun ni matut jat bang wa mai ai. Lahkawng maga gap hkat nga dingyang naw re. Shanhte maga na marai langai hpe mana lu rim la ai.”
Asuya dap gaw hpyen hpung (3) hte htim lung shamu shamawt nga ai hta Du Daju Myin Tsu woi awn ai Manmaw Ts.K.Hk Masat (21) npu zai ladat (1) Dkb. Myin Nai Win dap dung (Hk.M.Y – 387, Hk.L.Y – 57, Hk.M.Y – 319), zai ladat (2) Dkb. Mu Zaw dap dung ( Hk.M.Y – 428, Hk.M.Y – 320, Hk.L.Y – 47) hte zai ladat (3) Dkb. Min Nai woi awn ai dap dung ( HK.L.Y – 236, Hk.L.Y – 226, Hk.M.Y – 306) ni rai nna hpyen n-gun 2,000 daram hte shamu shamawt nga ai re lam chye lu ai.
Manmaw Ts.K.Hk Masat (21) zai ladat (1) gaw Mung Ding Pa, Mahkaw Yang, Nam Hpu, Kawng Ja hta shamu shamawt nga nna, zai ladat (3) gaw Je U, Nam Hkam, Gawng Run hta shamu shamawt nga nhtawm zai ladat (2) hpe gaw KIA Dung (12) ginra Saga Nam Hkum hta wang da dingyang naw re lam KIA maga kawn tsun ai.
Ya ten ginjaw Laiza Muklum hta amyusha rawtmalan hpung hkrumra zuphpawng gawlaw na hkyen lajang shajin nga ten e asuya maga na mung KIA shawnglam ginra ni de hpyen n-gun jat bang taw nga ai rai mali ai.
www.kachinnews.com
www.burmese.kachinnews.com
www.kahcin.kachinnews.com
www.kachin-news.blogspot.com
http://www.facebook.com/Kachin-News-Group
0 comments:
Post a Comment