KIO mungshawa sanglang hpawng Laiza kaw galaw

Oct-18-2013 ya Laiza dapshawa mungshawa, mungmasa sanglang hpawng.

Myen asuya hte amyusha laknak hpai hpung ni mungdan ting gap hkat jahkring lam hpe lata masat ka ai lam gaw laknak hpai ai hpung ni lapran chye na hkat ai hku gan la da ai rai nna, mungshawa a matu hpa akyu n rawng ai lam dai October (18) ya shani galaw ai mungshawa sanglang hpawng hta KIO salang langai tsun ai.

Dai mungshawa sanglang hpawng hta KIO simsa lam jahta dat kasa Sara Kaba Sumlut Gam hte Du Daju Gun Maw ni kawn October shata (8-10) ya du hkra galaw ai simsa lam bawngban hpawng hta myit hkrum ta masat ka da ai lamyan (7) hte lahkawng maga hkan nang hkansa ra ai lamyan (18) hpe sanglang dan nhtawm, mungshawa ni kawn matut nna kam hpa lu hkra shakut nga dingyang re lam asan sha brang mu lu hkra sanglang mat ai lam chye lu ai.

“Ndai zawn mungshawa sanglang hpawng galaw ai grai kaja ai. Shanhte bawngban myit hkrum da ai lam ni gara hku myit mada nna galaw nga ai ngu ai hpe asan sha mu mada mat ai. Myit hkrum da ai lam hte lahkawng maga hkan nang hkan sa ra ai lam ni hpe langai hpang langai chye na hkra tsun dan ai. Matut nna simsa wa na re ngu myit mada ai” nga sanglang hpawng lung ai Jan. Maran Kaw kawn tsun ai.

Dai kaw na buga masha langai gaw “mungshawa ni law malawng akyu jashawn nga ai lam hpaw lu hkra lawan ladan hkrang shapraw ging sai. Gara wuhpung wuhpawng mi rai rai mungshawa hpe madung tawn ai rai yang mungshawa nga mu nga mai lam hte seng ai matut mahkai lam ni hkrang wa lu hkra ahkyak ai ngu shadu ai” nga tsun ai.

Matut nna mungshawa sanglang hpawng hta madung hku na mungshawa ni chye na hkawn hkrang lu hkra jawm myit hkrum ta masat ka da ai lam ni gaw gap hkat jahkring lam a matu n re sha lamyan (7) hpe sha madung dat nna ta masat ka ai lam rai nna, dai lam ni hpe kaja nan hkrang shapraw lu yang majan matut manoi byin ai lam yawm mat na re lam Du Daju kawn tsun ai.

Asuya kawn mungdan ting gap hkat jahkring ta masat ka lamang galaw ai lam gaw mungdan gadaga masa hku yu yang jaw ang taw ai raitim, Myen mungdan a ya yang na masa hku nga yang mungmasa bawngban ai mahtang shawng galaw yang manu ai lam hte (17) ning ting a mahkrum madup hku nga yang snr shaning (50) ni a mahkrum madup hku nga tim mungshawa masha ni yawng mung chye da chyalu re lam tsun ai.

Dai mungshawa sanglang hpawng hta Wunpawng Mungdan Shanglawt Hpung (KIO) makan dap/magam dap shagu na magam gun ni, Laiza kata na tsin-yam masha ni, manam ni hte buga shawa masha hkying (2) jan sa du shanglawm ai lam chye lu ai.

www.kachinnews.com

www.burmese.kachinnews.com

www.kahcin.kachinnews.com

www.kachin-news.blogspot.com

http://www.facebook.com/Kachin-News-Group

Posted in: SHIGA