KIA Dapdung (12) hte Myen asuya dap majan byin

Simsa lam bawngban jahkrup nga ai lapran kawn Wunpawng Mungdan Shanglawt Hpyendap (KIA) ginra de asuya ni hpyen n-gun jat bang nga dingyang ten hta Dap Nu Masat (99) hte KIA Dapdung (12) lapran yat hte shani hkying 5:00 ten hta gasat kala ai lam byin mat wa ai.

KIA Masat (3) Dapba, Mabing myu-ne Dung (12) Je U makau Nam Hawm hta n-gun (100) jan nga ai Myen asuya Dapnu (99) hte minit (20) daram gap gasat hkat ai lam Dapba (3) na salang langai tsun ai.

“Anhte nga ai shara chye nga ninglen da sang kanaw shang wa nna lahkawng maga gasat hkat ai hta anhte maga hpa n byin ai shanhte ni mung htingnut mat ai” nga tsun ai.

Dai asuya dap gaw KIA nga ai shara de lam yen ya na tsun ai raitim KIA dap kawn lam n yen ya ai majaw lahkawng maga gap hkat ai re nga tsin-yam masha lakawn lanawn komiti ningbaw Salang Kaba Labang Doi Pyi Sa KNG Jinghpaw Shiga Dap de tsun shagrin wa ai.

Matut nna daini asuya hpyen n-gun (150) daram KIA Dung (27) ginra Man Win kawn Miwa ga Nawngtau maga de shamu shamawt wa nna majan matut manoi byin nga ai lam chye lu ai.

Dai zawn chya hkat wa ai lam gaw bawngban hpawng hta KIO maga gap hkat jahkring ta masat n htu ai majaw asuya ni shamu shamawt htim kapun wa ai re lam KIA maga na maram tsun ai.

Dai zawn hpyen yen dabang makau mayang hkan lahkawng maga gasat gala ai lam byin wa yang tsin-yam masha ni a matu tsang ra nga nna dai dabang makau gap hkat wa yang htawt sit ra na re lam KIO tsin-yam masha lakawn lanawn komiti ningbaw Salang Kaba Doi Pyi Sa tsun ai.

Yat hte shani mung KIA Dapba (5) ginjaw ginra Laiza de Manmaw maga kawn asuya dap Dapnu Masat (99) gaw hpyen mawdaw (13) hte n-gun (200) jan; mawdaw lahkawng hta laknak ni htaw sa wa nna Laja Yang makau Na Lung dap de hpyen n-gun jat bang wa ai lam Ba (5) na salang langai tsun ai.

Dai hku shuk nga ai lam hte asuya ni n-gun jat bang wa ai lam gaw KIA dap jung ai shara shagu kaw re nga tsun ai raitim asuya maga de shagrin da ai lam rai n nga ai.

Asuya hte KIO lapran October (8, 9, 10) hkrum shaga bawngban hpawng hta hpyen masa shayawm na lam hte majan kahtap nna n byin na matu jawm yu reng gawnhkang komiti (Join Monitoring Committee) hpe manghkang byin ai shara shagu hta akyu rawng ai hpaw shabawn hkrang hte hpaw nhtan sa mat na matu myit hkrum da ma ai.

www.kachinnews.com

www.burmese.kachinnews.com

www.kahcin.kachinnews.com

www.kachin-news.blogspot.com

http://www.facebook.com/Kachin-News-Group

Posted in: SHIGA