Shahtu Zup ja htu jak zing yu wa ai Myen hpyen ni hpe KIA hkap gap

Kambaiti lam maga na Myen hpyenla langai

Hugawng Pa, Jahtu Zup maga na ja htu jak zing yu wa ai Myen asuya hpyen hpung hpe Dumbang hte Hkum Tsai Yang lapran Wunpawng Mungdan Shanglawt Hpyendap KIA ni, daini hkap gap nna gasat gala majan byin wa sai.

Myen hpyen ni gaw, Lido lam mare Shahtu Zup a sinna Hkada Zup makau Lawt Ja mare ja maw na Miwa ni a backhoe, ja htu mawdaw 4 zing la nna Namti de yu wa ai re.

Jahpawt hkying 9 am daram hta bawm hte hkap gasat hkrum ai hpang, KIA Dap 14 hte Myen hpyendap lapran hkying 1:30 pm daram du hkra majan byin ai lam, ginra buga masha ni Jinghpaw Shiga Dap KNG de tsun ai.

Myen hpyendap maga 5 si nna hkala masha law ai lam, Hkum Tsai Yang mare masha ni tsun ai re. KIA maga na si hkala nga n nga n chye shi ai.

Ndai majan hte seng nna Laiza ginjaw Wunpawng Mungdan Shanglawt Hpung KIO Shi Htawn Magam Dap lit nga Du Kaba Nhpang Naw Bu hpe san ai shaloi, gasat gala majan byin ai hpe tsun shateng tim kata lam n chye shi ai lam, Jinghpaw Shiga Dap KNG de tsun ai.

Lido lam ntsa Hkum Tsai Yang mare gaw Namti hte deng 40 daram gang nna ya ten Myen hpyen ni dai mare hta hkring nga ai hte, hpyen n-gun garum ni du nga ai lam, buga masha ni hku nna chye lu ai.

Ndai shata praw kaw nna asuya hpyen hpung ni, KIA Dapba 2 npu Dapdung 14 ginra Shahtu Zup ja maw de htu gasat shang wa ai majaw laja lana gasat gala majan ni byin nga ai re.

Myen asuya shiga ni hta, Shahtu Zup e KIA hte byin nga ai majan hta tinang hpyendu hpyenla ni law law hkrat sum ai shiga n shalawm ai sha, ‘ja lagu htu ai laga mungdan masha Miwa ni hpe lu rim ai’ ngu ai shiga hpe mahtang shapraw ai hpe mu lu ai re.

KIO hpe NCA, mungdan ting gap hkat jahkring ga sadi, sen htu shangun mayu nna, ‘ya na zawn hpyen masa hte ja maw na shang gumhpraw dan di ai ladat hte dip n-gun jaw nga ai re majaw’ KIA maga ‘shagrawt majan n re sha shingla majan’ hpe galaw ra ai re lam, KIO Shi Htawn Magam Dap lit nga Du Kaba Nhpang Naw Bu tsun wa ai.

Posted in: