Friday, October 19, 2012

Maw Mau Bum de Myen amyawk hkra, KIA hte mungmasha si hkala hkrum



MAW MAU BUM KAW NNA HPAKAN DE MADA YU NGA AI MA LANGAI. SUMLA; KACHIN NEWS GROUP.
HPAKAN, JINGHPAW MUNGDAW — Mani bat Masum Ya shana hta Hpakan Uru Sengmaw Ga, Maw Mau Bum KIA dap hte mare de Myen asuya dap ni amyawk gap bun ai hta, hkra nna KIA hte mungmasha si hkala hkrum sai re.


Ya ten du hkra KNG Jinghpaw Shiga Dap sagawn chye lu ai hta, KIA dap 6 hpyenla 2 si, kaga 2 hkala nna mare masha 2 si, 5 hkala ai re.  Si hkala jahpan ndai hta grau law wa chye ai lam, matut chye lu ai.

Hpakan Myen hpyendap daju Byu-ha-kung kaw nna de a sinna maga deng 2 jan tsan ai Mau Mau Bum de shana hkying 10 kaw nna yuptung lai hkying 2 du hkra, amyawk 10 lang jan gap bun ai re nga, Dap 6 du salang ni tsun ai.

Shawng shana hta mung, ndai Myen dap kaw na sha Maw Mau Bum de amyawk 2 lang gap bun ai raitim wa hkrang kaw hkrat kapaw mat ai majaw masha si hkala n nga ai re.

Hkala hkrum ai mungmasha nkau gaw Hpakan asuya tsirung du nga sai rai nna nkau gaw Myitkyina tsirung de rawt mat sai lam, Maw Mau Bum buga masha ni tsun ai.

Mana si mat ai KIA hte mungmasha moimang ni hpe daini Maw Mau Bum kaw akyu hpyi makoi mayang na re lam, buga masha ni matut tsun ai.

Laklai amyawk gap ding
Hpyen masa hku yu yang Maw Mau Bum mabyin hta Myen asuya dap ni laknak kaba gap grai laklai ding wa ai lam chye lu ai.

Amyawk 10 lang jan gap ai hta, KIA dap hpe ang ang wa hkra ai lam, Dap-6 Dap Up, Lat Du Up Jum Nhkum Zau Doi a nta grupyin hkan wa hkra kapaw ai lam ni, bai mare masha ni a dum nta wa hkra kapaw wa sai re.

Lai wa sai August shata kaw nna Hpakan kaw byin wa ai majan ni hta ndai zawn asuya dap ni laknak kaba gap ding ai lam n nga ga ai lam, Hpakan na hpyen masa yu maram ai ni tsun ai.

Nkau tsun yang, lai wa sai bat hta KIA ni nga ai Maw Mau Lungbra, (Maw Mau Kapah) maw na Achyu-tu Mahn Ayeyar company na nlung gudawng, mungmasha ni baw la na ahkang KIA jaw dat sai re. Dai kaw lungseng wa hta la ai mungmasha ni lapran Myen hpyen masha ni lawm nna KIA shara ni hkrak hkrak hpe GPS (Jak Shagan garum ai hte lamu ga map sawk la ai ladat) hte sawk la ai mai byin ai nga nna, maram nga ai re.

Shawng e gaw dai shara ni de mungmasha ni shang na ahkang n jaw tawn ai re.

Bai nna, ndai shata praw de mung Mugawng kaw nna Hpakan de lung wa ai asuya hpyen hpung ni gaw KIA ni hkap sin ai shara ni hpe koi ai lam, hkam da ai bawm ni hpe seng kau rai nna, Hpakan Lungseng Maw de du hkra lung wa sai rai nga ai.

Myen hpyendap gaw KIA hpe Jinghpaw mungdaw hte Lahta Sam mung kaw gasat ai hta shawng e hpyen n-gun laba ka-up ai ladat kaw nna ya hpyen hpun



0 comments:

Post a Comment