Myen asuya dap ni n-gun grau jat

MYITKYINA KAW NNA JARIT SIN DAP DAJU PANGWA DE HPEN N-GUN WA JAT AI MYEN HPEN HELICOPTER NI.SUMLA: KACHIN NEWS GROUP

Myen asuya gaw KIO hpe simsa lam bawngban na saw shaga nga ai ten maga mi de KIO ginra de hpyen n-gun jat ai lam dingyang re lam chye lu ai.

Ya ten grau nna hpyen n-gun ni hpe Lahta Sam mung KIA Dapba ginra hte Jinghpaw mungdaw Hpakan KIA Dap 6 ginra ni de jat bang nga ai re.

Shawng e KIO kaw nna zing la ai shara shawnglam dap ni hta hpyen n-gun kachyi chyi jat bang ai lam ni, laknak hte malu masha jat ai lam ni galaw nga ai lam, Shawnglam KIA shiga lawk ni tsun ai.

Lai wa sai bat laman Jinghpaw hte Sam mung jarit KIA Dap 27 ginra de malu masha hte hpyen n-gun wa jat ai n-gun 50 jan asuya hpyen hpung hpe KIA kaw na yawm dik 5 lang gap shingla gasat ai lam galaw sai re.

Dap 27 hpyendu ni tsun ai hta asuya dap maga yawm dik 3 si nna 2 hkala ai lam tsun ai.

Bai nna teng pang gasat gala lam ni gaw Lahta Sam mung KIA Dap 2 ginra, Dap 8 ginra hte laksan KIA Munggu ginra ni hta byin nga ai re.

Posted in: SHIGA