Myen asuya a simsa lam saw shaga laika KIO lu

MYEN GINJAW ASUYA SIMSA LAM DATKASA WOI AWN NINGBAW U AWNG MIN (PAI) HTE KIA TAU DAP AWN DAJU DU UP DAJU GUN MAW.

Myen ginjaw asuya a simsa lam jahta na Wunpawng Mungdan Shanglawt Hpung (KIO) hpe saw shaga ai laika hpe KIO ginjaw Laiza kaw nna hkap la lu sai lam bai htang dat sai re.

KIO ginjaw salang ni tsun ai hta dai Naypyidaw asuya a laika hpe lai wa sai bat hta lu la rai nna Lahta Sam mung Muse shing n rai de a man Miwa hkran N’Mau Shwili, shara ra kaw hkrum bawngban na saw shaga ai lam tsun ai.

Shiga ni hta gaw uhpung lahkawng dat kasa ni October 15 bat Langai Ya n du shi yang hkrum shaga na mai byin ai tsun wa sai.  Raitim Gumsan Magam Ting Tsing asuya a simsa lam jahta na saw shaga ai lam ntsa KIO maga ginjaw zuphpawng pyi n hpawng shi ai madang re lam salang ni tsun ai.

Lai wa sai August shata hta mung Naypyidaw de simsa lam bawngban na saw shaga ai raitim KIO gaw asuya uphkang ai shara de n lu sa shaga ai lam ningdang kau sai re.

Lai wa sai shata htum wa de UN Mungkan Wunpawng Hpung zuphpawng sa lawm ai shaloi Salang Ting Tsing gaw Jinghpaw mungdan kata majan n hkring hkraw ai lam ntsa KIO hpe mara jaw dinglun wa sai re.

Salang Ting Tsing a BBC shiga dap de tsun ai hta KIO maga majan n jahkring ai majaw asuya dap ni ninghkap nga ai she re lam tsun wa sai re.  Ndai lam ntsa KIO kaw nna n hkap la ninghkap ai lam galaw sai re.

Posted in: SHIGA