UNFC hpe Japan asuya Amerikan dollar wan 3 garum

UNFC JINGHPAW DATKASA HPUNG NINGBAW DUWA BAWMWANG LARAW (PAI KAWN HKRA, SHANG NA YAN NAMBAT 3)

Myen mung amyusha hpyen masa mungmasa daphpawng UNFC hpe Japan asuya kaw nna shinggyim nau na garum ntum gumhpraw Amerikan dollar wan 3 garum jaw sai re.

UNFC datkasa hpung hte Japan asuya salang ni lapran Tokyo mare daju kaw zuphpawng galaw ngut ai hpang, ndai garum ntum Japan Yen wan 240 (Amerikan dollar wan 3) hpe garum jaw na daw dan tsun wa ai re.

The Associated Press shiga hta shihtawn Mari Yamaguchi ka ai gaw, ndai zawn re ai garum gumhpraw jaw na shawng n’nan lang Myen asuya kaw nna myit hkrum dat ai mung re lam, tsun ai.

Ndai gumhpraw hpe hpyen yen ni a malu masha hte tsi mawan a matu yaw shada garum jaw ai re nga, Nippon Foundation tsun ai.  Ndai uhpung gaw Japan asuya hte bungli matut galaw ai shinggyim nau na garum ntum hpung langai re.

Tokyo zuphpawng hta, “Mungdan gadaga kaw nna Myen ginjaw asuya hte amyusha rawt malan hpung ni lapran galaw tawn ai gap hkat jahkring myit hkrum lam ni hpe yu maram nga na ra ai lam,” UNFC a ginrun amumadu Salang Hkun Okker tsun wa sai re.

Japan gaw Myen mung gat lawk hte dai mung na nhprang sut rai lu hkra, grau nna, Miwa hpe shingjawng nga ai re.

Ndai United Nationalities Federal Council (UNFC) ngu ai amyusha hpyen masa mungmasa daphpawm hpe, mungdan kata laknak hpai hpung yawng 11 nga ai kaw nna, uhpung 10 hte hpaw shabawn tawn ai re.  Ya ten gap hkat n jahkring ai gaw Wunpawng Mungdan Shanglawt Hpung (KIO) sha re.

Shata 15 jan byin ai majan a majaw Jinghpaw mungdaw kata hpyen yen (internally displaced persons) masha ni 100,000 hkawt du nga sai re.  Shanhte hta law malawng gaw KIO ginra hta shingbyi nga ai rai nna malu masha hte tsi mawan garum ntum grai kadawn nga ai lam chye lu ai.

UNFC datkasa hpung hta Jinghpaw gawng malai hku nna Duwa Bawmwang Laraw woi awn ai hte KIO kaw nna Ningtau Ninggawn Amumadu-1 Wawhkyung Sin Wa hte Alex Gawlu La Awng yan shanglawm ai lam chye lu ai.

Posted in: SHIGA