Chipwi-Lawk Hkawng de asuya hpyen maden htim gasat ai majaw KIA dap 2 hting nut kau

Sadung ginra shawnglam kaw du nga ai KIA hpyen hpung langai.

Jinghpaw mungdaw Waimaw ginwang Chipwi-Lawk Hkawng hta Myen asuya dap ni hte Wunpawng Mungdan Shanglawt Hpung (KIA) lapran majan matut manoi byin nga nna KIA dap jung da ai shara 2 hpe ya yang hting-nut kau ra mat sai lam chye lu ai.

Asuya dap Hk.L.Y masat 260, 29 hpyen hpung hte Jarit Sin Dap (Border Guard Force) hte dap hpawm wuhpung (4) ni gaw February 23 ya shani kaw na htim maden gasat wa ai majaw htingnut kau ra mat ai rai nna, majan matut manoi byin nga ai gaw bat mi ram na sai re.

“Lawk Hkawng maga kaw na hpyen hpung 2, Myaw Jaw maga na hpyen hpung 2 htim lung wa ai. Shanhte maden lung wa ai majaw dai kaw gap hkat yang anhte ginra na mungshawa ni hpe hkra na tsang ai majaw, Myaw Jaw dap hte dai makau na dap hpe hting-nut kau da ai,” nga Chipwi kaw du taw nga ai mying n kam brawng ai KIA du kaba langai tsun ai.

Ya na ten hta majan byin nga ai gaw KIA Dapba (1) npu na Dung (10) hte asuya dap dung (260) mung lawm ai Jarit Sin Dap (BGF) hpung ni, pawng hpawm n-gun gahkyin 300 ram lapran, shara shagu hkan gasat hkat nga ai re nga, lahta KIA hpyendu wa ndai zawn matut tsun ai.

“Kru ya shani Lawk Hkawng lahta kaw shara mi, Tsu Si nga ai shara, Bat Myaw nga ai shara, Myaw Jaw ngu ai shara (4) kaw majan byin ai. Laban shani, bat Langai Ya kawn  masum ya du hkra Lawk Hkawng lahta kaw gap hkat ai. Dai shara kaw gaw asuya maga na kachyi myi hkrat ai. Masum ya shani gaw anhte maga na asuya a bawm hte marai langai hkala ai. Mani gaw Saw Law kaw gap hkat ai. Anhte nga ai shara kaw shanhte sa gap ai.”

Dai zawn majan byin wa ai majaw Lawk Hkawng hte Myaw Jaw mare kaw htinggaw yawng 100 daram nga ai hta na mungshawa ni gaw KIA dap nga ai shara de hprawng yen nga nna, ya ten hta shanhte ni a malu masha hte hpun palawng a matu KIA hpyendap na malu masha ni hte she byin mai ai hku garan sha nga ai lam chye lu ai.

Ya na ten dai ginra hta hprawng shingbyi nga ai tsin-yam masha ni nga ai shara de hkawmsa hkawmwa lam yakhkak nna shanhte a matu malu masha, bu hpun palawng a matu  tsang ra ai lam chye lu ai.

Dai ginra hta February shata praw kaw na asuya dap ni gaw helicopter ni hte laknak n-gun, masha n-gun, malu masha ni jat bang nga nna dai mare kaw mu mamu mung mare masha shagu hpe (Pawta) shaga nna laknak hte malu masha ni gun shangun taw nga ai lam chye lu ai.

Dai Chipwi-Lawk Hkawng ginra hta asuya hpyenla ni gaw Wunpawng Mungdan Shanglawt Hpung (KIO) ginjaw de laja lana htim maden gasat ngut ai hpang, dai shara maga de kalang bai shara la n-gun jat bang wa ai shara mung rai nga ai.

www.kachinnews.com
www.burmese.kachinnews.com
www.kahcin.kachinnews.com
www.kachin-news.blogspot.com
http://www.facebook.com/Kachin-News-Groupး

Posted in: SHIGA