Mali Zup madim gan hkring tim, htawt sit hkrum ai buga masha ni n mai wa

Awng Min Ta asuya htawt sit mare n'nan.

Jinghpaw mungdaw Mali-N’Mai Zup hka wanjak masing hpe mungdan gumsan magam hku nna gan jahkring ai laning mi jan na sai raitim, Awng Myin Ta asuya mare n’nan de htawt sit hkrum ai mare masha ni, tinang mare de bai nhtang wa na ahkang n lu shi ai re.

Hka madim masing hpe gumsan magam Slg. Ting Tsing pat da ai hpang, gaw gap company CPI (China Power Investment) a jak rai ni hpe January shata kaw na daini du hkra nhtang dawm la nga ai majaw Aung Myin Ta mare masha ni mung tinang buga ni de nhtang wa na myit makun nga ai re lam chye lu ai.

“Dai kaw nga na tam lu tam sha grai yak ai law.  Ya mung nkau mi gaw htaw kaw wa nna galaw sha ai ni mung nga ai.  Sun wang ni, yi ni, ja ni kaji kajaw htu sha ai le. Moi gaw chye jang gawt ai. Rai timung ya garai n gau ai. Dai zawn sha galaw sha nga ai law. Kru ya Laban nga yang ndai de bai wa ai. Bat langai ya shani nga yang bai lung mat wa ai. Ndai kaw na wa wa sa sa galaw nga ai ni mung nga ai. Nkau gaw nang kaw byin mai ai hku gat dut sha ai ni mung nga ai,” nga Awng Myin Ta mare masha langai tsun ai.

Hka madim masing a majaw htawt sit hkrum ai mare masha ni hpe CPI kawn n-gu garum jaw nga ai raitim si mai, tsi mawan ni n lawm ai majaw yak yak hkak hkak tam sha ra ai lam buga masha ni tsun ai.

Gumsan magam wa hka madim gan jahkring da ai ten, asuya htawt sit mare masha ni “tinang buga de wa mai na, n mai na” masa ntsa myit shuk nga ai nga nna, Awng Myin Ta mare uphkang du Salang Muk Lung tsun ai.

“Ya du hkra gaw wa mai sai lam hpa gaw n tsun ai. Wa mai yang wa na ni hkrai re. Raitim wa nna, tinang nta tinang bai gap la ra na nga yang n mai byin ai ni hkrai re. Nkau lu ai ni mung nga ai. Kalang bai htaw wa htaw sa na gaw n loi ai. Ndai de htawt wa ai pyi asuya ni garum na she htawt la lu ai re. Tinang hkrai galaw na nga yang n loi ai. Kaja wa nga yang n mai byin ai”.

Asuya mare n’nan kaw hkai lu hkai sha mung n mai ai majaw mare masha ni mi na tinang mare dingsa ni de bai nhtang wa na grai myit makun nga ai lam re.

Htawt sit hkrum ai Mali Zup mare Tang Hpre kaw gaw ja htu, hkai sun hte rem lu rem sha bungli ni galaw nna mare masha ni kan bau nga ai re.

Mali-N’Mai Zup hka wanjak masing a marang, dai masing kata na mare kahtawng masha ni hpe 2010 ning May shata praw kaw na Awng Myin Ta asuya mare n’nan de htawt sit hpang wa ai re. Ya ten dai mare de htawt sit hkrum ai mare masha yawng--- dum nta 327 hte marai 2,000 jan re.

Mali Zup hka madim masing hpe 2007 ning kawn Miwa CPI hte Myen mung na asuya Masat (1) Myihprap Wan Dap hte Asia World Company ni jawm galaw hpang ai re.  Raitim ndai madim hpe mungdan ting madang ninghkap wa ai majaw Slg. Ting Tsing gaw shi a asuya daw hta dai masing gan jahkring sai lam hpe 2011 September 30 ya asuya rapdaw zuphpawng hta sanglang dan sai re.

www.kachinnews.com
www.burmese.kachinnews.com
www.kahcin.kachinnews.com
www.kachin-news.blogspot.com
http://www.facebook.com/Kachin-News-Group

Posted in: SHIGA