Hpakan-Gwi Hka Lam de Myen hte KIA gap hkat

KIA Dung 6 hpyenla ni, jinghpawmungdaw sinna

Hpakan lungseng maw Gwi Hka lam maga Myen asuya dap hte Wunpawng Mungdan Shanglawt Hpyendap (KIA) lapran, dai hpawt daw aten kadun gap hkat wa sai re.

Ja Ra Yang maga KIA Dung(6) a shawnglam dap nga ai de Myen hpyen ni sa shang wa ai majaw jahpawt hkying 6 daram kaw nna gap hkat ai aten minit 10 jan re lam, KIA ginjaw Laiza na lit nga KIA Du Kaba Nhpang Naw Bu, Jinghpaw Shiga Dap KNG de tsun shateng ai.

Myen dap maga Hk.M.Y Masat 421 hpyen hpung re lam, mungshawa shiga lawk ni tsun ai re.

Ja Ra Yang maga Myen ni dap galai gachyai gabaw hte n-gun wa jat ai masa mu lu nna dai dap ni KIA dap de sa shang wa ai majaw ya na zawn gap hkat wa ai rai nna, Myen ni matut shanang wa yang majan mai kaba wa ai lam, Du Kaba Naw Bu tsun ai.

Maga mi de, Lahta Sam mung KIA Dapba 4 ginra Dung(8), Dung(36) hte Dung(2) ginra ni hta, mani du hkra Myen hpyen ni hte gasat gala byin ai lam, Du Kaba Naw Bu matut tsun shateng ai re.

Ndai gaw KIA hpe jahte tam hkawm ai, mara tam hkawm ai sat lawat rai nna, tinang KIA maga loi ninggun dat gap ai hte gaw shanhte maga manu mana gap wa na masa pru ai nga nna, du kaba Naw Bu shi a ningmu tsun ai re.

Hpyendap a shingnan pyi-hkai-hpyu pati, USDP asuya gaw Nov. praw 8 ra lata poi dang ai NLD hpe mungdan a daru magam n ap shi yang, mungdan ting gap hkat jahkring ga sadi (NCA) sen n htu ai KIA sha n ga, Sam mung e nga ai kaga hpu nau rawt malan hpung ni hpe mung lagaw dap, nbung dap ni hte laja lana htu gasat ai lam ni galaw nga ai re.

Ya ten du hkra KIA maga gaw asuya dap hpe sa htim gasat ai lam n galaw ai sha n ga, mai byin ai made majan koi yen nga dingyang re lam chye lu ai re.

Posted in: