Hpakan, Ja Ra Yang majan hta KIA du 2 hkrat sum

KIA Share Kawng, Hpakan

Mani hpawt Hpakan, Gwi Hka lam Ja Ra Yang hta byin ai majan e Wunpawng Mungdan Shanglawt Hpyendap KIA maga du 2 hkrat sum ai lam, KIA Laiza ginjaw tsun shateng ai.

KIA dung(6) a shawnglam dap de shang wa ai Myen asuya dap hte aten minit 10 jan gap hkat ai shaloi hkrat sum ai KIA hpyendu 2 gaw Mungshawa Hpyen Hpung (MHH) na re lam, Laiza na lit nga Du Kaba Nhpang Naw Bu kawn KNG Jinghpaw Shiga Dap tsun ai.

Hpakan buga masha ni tsun ai hta, hkrat sum ai KIA share shagan yan gaw Du hte Du Jum atsang rai nna shan gawp nga ai shara de amyawk pala wa hkrat ang nna hkrat sum ai re, nga ai.

Ndai gasat poi gaw Hpakan de lamu ga shachyen dap galai gachyai du wa ai asuya dap n’nan hte byin ai re lam, Du Kaba tsun ai. Mungshawa shiga lawk hku rai yang, dai dap gaw Tawnggyi daju Sinpraw Daw Daju (Y.P.Hk) npu Hpe-Hkung hkridun Hk.M.Y Masat 421 re.

Aten kadun gap hkat ai hpang Myen dap ni bai htingnut mat ai majaw majan matut n byin ai lam chye lu ai re.

Ya ten KIA maga, Myen dap ni hpe matai htang sa htim gap na masing n nga tim, tinang dap de htu shang wa yang gaw gap na sha re lam, Du Kaba Naw Bu tsun ai.

Myen asuya dap gaw, NCA Mungdan Ting Gap Hkat Jahkring Ga Sadi sen n htu ai Sam mung e nga ai rawt malan hpung ni--- KIA Dapba 4, Balawng (PSLF/ TNLA), Sam (SSPP/SSA), Kokang (MNDAA) ni hpe lai wa sai October shata kaw nna n-gun kaba hte htu gasat nga ai majaw shani shagu ngu na majan byin nga ai re.

Posted in: