Kutkai Rev. Labya De Masat Laika Dum a matu gat dut poi galaw

Lahta Sammung Jinghpaw Wunpawng amyusha ni a matu gawgap nga ai Kutkai Laika Dum a alak mi myit sharawt alu tam ai lahkawng ya gat dut poi lamang hpe angwi apyaw hte mani galaw lu sai re.

Htap mali nta laika dum Rev. Labya De Masat Hpaji Sawk Gindai hpe Kutkai Jinghpaw Wunpawng Chyum Hkawlik (KTC-Kutkai) jawng wang e dai ning kaw nna gawgap sa wa ai re.

Wutdek hte gawgap nga ai ndai htingnu a hkrat ang ai manu gaw Myen kyat sen 5,600 (US$ 431,368) maram tawn nhtawm, ya lu da ai kyat sen hkying mi jan hte dai ning kaw nna gawgap hpang wa ai re nga, jawng up Rev. Dr. Maran Sing Gawng tsun ai.

Ndai laika dum a matu da da ai budget malawng maga ra gadawn nga ai majaw, ya na zawn December praw 1 Sweet December hkap let myit sharawt alu tam gat dut poi lamang galaw ai re lam, jawng up wa tsun ai.

Jinghpaw htingga, shingnoi hte htunghking bu hpun palawng ni sha n ga shat jam, shan ju, hpalap, hotpot lusha ni hte kaga hkai nmai namsi namsaw hpan hkum hkra ni hte gat dut poi galaw ai re. Bai nna yu ngwi pinra hpe mung kapyaw nna galaw ai re.

Lahkawng ya gat dut poi hta Kutkai buga masha ni sha n ga Mung Myit Sinli Ga shara shagu de na hpung masha ni hte kaga hpunau amyusha ni mung kabu gara sa du n-gun jaw shanglawm wa sai lam chye lu ai.

Kutkai Chyumjawng (Kachin Theological College, KTC-Kutkai) gaw, 2011 ning Myen asuya hte Wunpawng Mungdan Shanglawt Hpung (KIO) lapran majan bai byin wa ai kaw nna hpyen yen (IDP) manghkang pru wa ai majaw alu tam ai lamang hpe ya ten du hkra gan jahkring tawn ai re.  Raitim ya IDP manghkang loi sim wa ai aten e ndai gat dut poi galaw ai re lam hpe jawng up Sara Sing Gawng tsun ai re.

Rev. Labya De Masat Hpaji Sawk Gindai (Laika Dum) hta, Chyum Laika hte seng ai lam, hpungtang hpaji hte seng ai lam, hkailu hkaisha hte rem lu rem sha hte seng ai lam, liberal arts (mungmasa lam, shinggyim hpaji lam, shingni lam hte kaga) hte seng ai laika ni sha n ga prat dep internet library hpe mung tawn da na rai nna, ni ai tsan ai buga masha kadai rai timung sa shang sawk hti lu na matu yaw shada ai lam, jawng up wa tsun ai re.

Du na 2017 ning March shata hta galaw na hkyen nga ai, Kutkai chyum jawng hpe Sammung Mung Myit Sinli Ga buga masha ni lit la woi awn wa ai shaning 50 ning hpring (1967-2017) ai Ja Jubili Poi Kaba hta ndai Rev. Labya De Masat Laika Dum hpaw poi hpe galaw na re lam chye lu ai re.

Rev. Labya De kadai ta?

Hpung up sara Rev. Lashi Labya De gaw, 1930 ning Yangon Amerikan Hkalup Sasana ningpawt de Jinghpaw chyum jawng sa hpyi ai shaloi shang lawm lai wa sai sara usa masum hta, shi gaw Lahta Sammung Mung Myit Sinli Ga a gawng malai sa lawm sai re.

Ngam ai sara yan gaw, Manmaw Ga na Sara Usa Rev. Lahpai Zau Tu hte Hpaji Du Usa Sara Maran Robin re.

Jinghpaw Wunpawng Hkalup Hpung Ginjaw (KBC) kata nga ai chyum jawng kaba lahkawng--- Jinghpaw Mungdaw Nawngnang Chyum Dakkasu (KTCS) e laika dum (Rev. Lahpai Zau Tu Masat Hpaji Sawk Gindai) nga sai raitim Kutkai Chyum Hkawlik (KTC) e n nga shi ai majaw ya Rev. Labya De masat laika dum gawgap nga ai lam rai nga ai.

Matsing: Kutkai Rev. Labya De Masat Laika Dum a matu alak mi alu jaw mayu ai ni, ndai KTC-Kutkai Chyum Hkawlik jawng up Rev. Dr. Maran Sing Gawng (+95 (0) 92 564 26176) snr rung (+95 (0) 82-62254) de matut mahkai ga. Chyeju kaba sai.

Posted in: