 |
| Mung Gu Buga Hkaluphpung a jaw Poi hta jubeli |
Htunghking ji nat jaw ai Mung Gu ginra de 1913 ning Amerikan Hkalup sasana sara Rev. Dr. Ola Hanson dat dat ai Sara Pau Hkang Hka shawng n’nan ap nawng ai hpang, 1915 ning hta Maran Hkun Seng ngu ai wa shawng n’nan hkaplup hkam la sai. Dai hpang dai ning latsa ning hpring ai ten Mung Gu Buga Hkalup Hpung ngu nna byin wa ai mung 25 ning hpring sai re.
Dai re majaw, Hkalup Hkam Jaw Poi hte Buga Hpung a gumhpraw jubeli chyeju shakawn lamang hpe December 16, Bat Masum Ya shani galaw sai. Bai nna Mung Gu ginra de Karai Mungga Nhtoi shang wa hkra lam tam woi ningshawng wa sai Karai magam gun ni hte amyusha ningbaw ningla du salang ni hpe mung chyeju dum masat shagrau ai lam hpe mung galaw sai re.
Ya ten Mung Gu Buga Hkalup Hpung kata hpung htinggaw 530 jan, hkalup hkam la ai masha 1,400 jan hte hpung masha kaji kaba yawng 3,000 jan du nga sai lam, hpung woi wa Rev. Waje Brang Awng tsun ai.
Ndai laman poi ni wa ten, Mung Gu mare kata Myen asuya dap hte Wunpawng Mungdan Shanglawt Hpyendap (KIA) lapran gap hkat wa ai majaw December 14-18 poi lamang ntsa myit tsang ai lam ni byin wa sai. Raitim, alak mi asuya dap ni shimlam jahtap da ya ai npu, Jaw Masat Sut Manau hpe mung shawa daw tsa hte December 15-16 lahkawng ya wu wu di di galaw lu ai lam chye lu ai.
Lak lai ai lam langai gaw, shawng de KIO/KIA ni n nga ai Myen Mung Kummyunit Pati ga-up tawn ai Mung Gu ginra e poi lamang hpe KIO snr Amyusha Dawnghkawn hpe Manau Wang hte poi shara ni hta n-gun mi alu sharawt let galaw lu ai lam re.
Ndai jaw poi de Jinghpaw Wunpawng Hkalup Hpung Ginjaw (KBC) amu madu Rev. Dr. Hkalam Samson hte Lahta Sam mung shara shagu e na hpung kanu kawa ni, amyusha ningbaw ningla ni, hpunau Sam, Balawng, Miwa hte Lisaw (Lisu) ni hte htingbu Miwa mung na amyusha ni mung kabu gara sa du shanglawm ma ai lam chye lu ai.
0 comments:
Post a Comment