Hugawng Pa kani sun dan shamyit masing hpang

Jan 12 ya kaw nna shaga n-gan hte Hugawng Pa e kani yi dan shamyit masing galaw nga sai

 January 12 ya kaw nna, asuya n re ai mungshawa n-gun kaba hte labu pan kani yi dan shamyit ai masing hpe Jinghpaw mungdaw sinna Hugawng Pa e galaw hpang dat sai re.

Ndai masing hta Danai, Ledo lam mayan, Mogawng, Hopin, Mung Nyang, Hpakan hte Myitkyina mare buga hkan na mungshawa n-gun 500 jan shanglawm ai.  Shanhte gaw wuhpung 8 garan nna kani yi dat shamyit ai lam galaw nga ai hpe sagawn chye lu ai.

Hugawng Pa hta ja maw hte pat maw chyai nna masha mun kaba nga ai hte kani gat lawk kaba langai re.  Bai nna mungdaw kata kani sun No. 2 law dik ginra mung rai nga ai.

Ya kani hpun ni pu kabawng nga ai ten pat jasan masing hpang dat ai lam re.

Jinghpaw mungdaw kata Myen asuya Jarit Sin Dap (BGF) uphkang ai Waimaw ginwang Kambaiti ginra hta kani law dik hkai ai rai nna Putau Ginwang de mung shaning hte shaning kani yi law jat nga ai lam chye lu ai.

Kani nanghpam pat jasan masing hpe lit nga ai Myen asuya hte KIO kaw nna galaw nga ai raitim tang n du ai majaw, 2014 ning kaw nna gaw mungshawa pat jasan masing galaw wa ai re.

Posted in: