Shawa n-gun kaba hte Mali Hka sinpraw hkran kani pat jasan rawt

Mali Hka sinpraw hkran labu pan kani pat jasan masing rawt

Jinghpaw mungdaw Mali Hka a sinpraw hkran kani sun ni hpe dan shamyit na masing hte mungshawa n-gun kaba gaw January 18 ya shani Waimaw mare e du gahkyin nga sai re.

Ndai mungshawa kani nanghpam Pat Jasan Hpung hta mungdaw shara shagu nawku hpung hkum hkra na masha n-gun 1,200 jan shanglawm ai hte shanhte gaw wuhpung 12 garan nna kani yi dan shamyit mat na re lam chye lu ai.

Jinghpaw mungdaw kata Waimaw ginwang gaw kani sun law dik nga ai shara re. Madung gaw, Myen asuya uphkang shara Sadung hte shawng de NDA-K, ya asuya Jarit Sin Dap (BGF) uphkang ginra Kambaiti ginra ni hta kani hpe wanglu wanglang hkai nga ai re.

Dai ginra lahkawng de January 19 ya shani Pat Jasan Hpung ni Waimaw kaw nna rawt lung wa ai hpe kani sun madu ni hpun tawng ni lang let lam pat ninghkap ai lam pru wa ai majaw mungdaw asuya kaw nna gan hkum tawn sai.

Raitim, mungdaw asuya hte bawngban jahkrup lu ai hpang, asuya pyada ni shimlam la ya ai npu dai ginra lahkawng de kani sun pat jasan masing hpe January 23, Hpawt Ni, galaw hpang na re lam chye lu ai.

Ya ten mungshawa n-gun hte kani yi dan shamyit masing hpe Hugawng Pa hte Putau Ginwang lahkawng hta mung n-gun dat galaw nga ai re.

Ndai zawn galaw nga ten, Hugawng Pa kani pat jasan masing hta lawm ai Mugawng, Labang Kahtawng na ramma Shadang Lahtaw Yosep Tu Tsai, asak 19, gaw January 15 ya shani kani sun madu ni a dumhpau sinat hte lagu gap sat kau hkrum sai re.

Myen mung kata Sam mung ngut jang, Jinghpaw mungdaw gaw kani law dik hkai ai ginra re. Bai, Afghanistan mungdan a npu Myen mung gaw mungkan e kani no.2 law dik hkai ai mungdan re.

2011 ning Sam hte Jinghpaw mungdaw kata majan bai byin wa ai hpang kani hkai ai lam mung grau grau lawt jat nga ai lam Mungkan Wunpawng Kani Nanghpam hte Ru Hka Rung (UNODC) a samtang hta madun ai re.

Posted in: