Mungshawa Pat Jasan Hpung luksuk ni Kambaiti de rawt

Jan 23, dai hpawt hkying 10 kaw nna Mungshaw Pat Jasan Hpung luksuk ni Kambaiti de rawt.

KNG, Waimaw — Myen asuya Jarit Sin Dap (BGF) uphkang ai Kambaiti ginra kata labu pan kani dan shamyit masing hte Waimaw e gahkyin nga ai Jinghpaw mungshawa Pat Jasan Hpung luksuk ni dai hpawt hkying 10 hta rawt lung wa sai re.

Masha n-gun 1,600 jan shanglawm ai mungshawa luksuk hpung gaw mawdaw 60 jan hte, Kambaiti pat jasan hpyen man de madung lung wa nna, Chipwi pat jasan hpyen man de nkau, garan lung wa ai re.

Mungdaw asuya pyada n-gun 50 daram mung shinglam jaw, shanglawm ai lam chye lu ai.

Ndai Pat Jasan Hpung kata wuhpung 12 garan nna dai hpe “Dap Dung 1 kawn 12” ngu shamying da let kani sun dan shamyit masing hpe January 18 kaw nna February praw 4 Rawt Malan Nhtoi shawng shani du hkra galaw na re.

Lahta Rapdaw salang Zahkung Ting Ying woi awn ai NDA-K, ya Myen asuya Jarit Sin Dap (BGF) uphkang ginra Kambaiti gaw Jinghpaw mungdaw kata kani law dik hkai ai shara re.

Kambaiti lam ntsa kani sun madu ni hpun tawng ni hpai let lam pat ninghkap wa ai majaw Mungdaw asuya lapran shang nna gan hkum da ai hpang January 21 hta ahkang bai jaw ai re.

Posted in: