Myen asuya jasat simsa lam hkra ai ngu UWSA hte SSPP tsun

KIA hpyen du jawngma ni

Wunpawng Mungdan Shanglawt Hpung (KIO) Ginjaw Laiza du jawngma 23 si ai lam ntsa ninghkap ai lam hte simsa lam hkrang shapraw wa ai lam hpe hkra shangun ai nga UWSP, NDAA (Mongla) hte SSPP/SSA uhpung ni kawn ninghkap ni lam tsun dat ai.

Mungdan kata simsa lam lu wa sana aten ladaw hta dai zawn re manghkang byin mat wa ai majaw alak mi ninghkap dat nhtawm lahkawng maga hkrum shaga bawngban ai lam ni galaw nna mungdan ting madang gap hkat jahkring ga shaka la na matu shadut da ai ginrun ndau shabra laika hpe November 23 ya shani shale dat ai.

“Ndai gaw tara masan hte n bung pre ai. Simsa lam galaw nga ai ten kaw ndai zawn byin ai nga yang hkring mat wa chye ai. Makam grau yawm mat sana le. Simsa lam ahtu hkra ai lam nga ai. Dai chyawm hkrit hpa le i. Ndai lam hpe kalang bai shakut ra na re. Asuya maga mung ndai hkrang hte hkrum mai sa u ga le. Htu gasat ai lam ni jahkring nna bawngban hpawng hta lu jahkrup hkra shakut ra na re” nga United Wa State Party (UWSP) kawn tsun shaga ahkang lu ai Slg. Awng Myin tsun ai.

Jet ai simsa lam ra sharawng ai lam hpe htawng madun na matu manghkang byin ai lahkawng maga tinang tinang shakang hkat let manang wa hpe yup nga magra htu gasat nga ai lam ni n galaw na matu, UPWC hte amyu sha laknak hpai rawt malan hpung ni hkrum shaga ganawn mazum ai lam hpe shanang sa let gap hkat jahkring bawngban ai lam ginchyum dat kau nhtawm mungdan ting madang gap hkat jahkring ga shaka lawan ladan la lu na matu shadut dat ai.

Si hkala hkum ai ni mung sai daw sai chyen ni hkrai sha rai nna dinghku masha shada da nhtu nri hte gasat hkat ai lam gaw mungdan hte amyu sha ni a akyu hpe hkra shangun ai nga tsun tawn da ai.

November 19 ya hta KIA ginjaw Laiza makau Hpyen Du Shalat Jawng de Hka Ya Bum na Myen asuya dap Hk.M.Y Masat (389) gap dat ai 105 MM laknak kaba a majaw Du Jawngma 23 si mat nhtawm marai 20 hkala mat ai rai nga ai.

Shing re ai sat lawat hpe Myen asuya maga kawn n dum shami byin mat ai lam re nga htang shana da ai rai nna Myen mung na amyu sha laknak hpai rawt malan hpung ni law malawng gaw simsa lam hpe ahtu hkra shangun ai jasat re ngu jahpoi ahpyak da ai ndau laika ni shing shing rai shapraw masai rai nga ai.

Posted in: SHIGA