Monday, November 3, 2014

War Fund hta ai lam hte KIO masha (1) hte kahtawng masha hpe Myen asuya ni rim

Hpakan, KIA Dap 6 hpyenla ni

Jinghpaw Mungdaw Hpakan ginra Wunpawng Mungdan Shanglawt Hpyen Dap (KIA) Dap Dung (6) Dap Kung (2) Laisai Ginwang Daw na rung chyare langai hte kahtawng masha langai hpe Myen asuya dap kawn war fund (Hpan Gumhpraw) hta kahkyin ai amu hte rim da ai lam chye lu ai.

Shan-yan hpe October (29) ya shani Laisai kawn Ta Mahkan de sa ai lam numshe hta Ta Mahkan kaw dung ai Hk.L.Y Masat (35) Dung Up Chyaw Chyaw Hkai woi awn ai dap ni kawn rim mat ai re lam kahtawng masha ni tsun ai.

Rim hkrum ai marai 2 gaw Laisai Ginwang Daw Uphkang Rung kawn Chyare. Damau Naw Ja hte kahtawng masha Tangbau Hkawng Dau yan rai nhtawm Myen gumhpraw Kyat sen (200) jan hte hpawn rim hkrum mat ai re lam, daini Hpakan Pyada Dap de sa jahkrum na rai nga ai kahtawng masha Sara. Lama Brang Awng KNG Jinghpaw Shiga Dap de tsun ai.

“Dai yan hpe n tara ai war fund hpyi hkawm ai lam daw; 386, garum lawm ai hte seng ai lam daw; 114 ni hte rim ahkyak la da ai. Hpakan ginra na salang ni hte rai n lu hkrum shi ai, ya she Hpakan Pyada Dap de sa taw ai” nga tsun ai.

Myen asuya dap ni gaw Ta Mahkan Pyada Dap kaw rim da ai hpang Hpakan Pyada Dap de sa kau dat ai lam rai nna Dap Dung Up wa nan tara shawk masha hku nna shawk da ai lam re hpe chye lu ai.

Dai yan lahkawng hpe KIO Laisai Ginwang Daw lit nga ai ni hku nna dai gumhpraw ni hpe Ta Mahkan de sa shangun dat ai lam mung re hpe chye lu nna dai zawn asuya dap ni maga kawn Shanglawt magam gun masha ni tara shang ahkun hta kahkyin ai lam ntsa war fund hta hkawm ai ngu rim ai lam ni jahkring hkring la-byin ga ai lam Wunpawng Mungdan Shanglawt Hpung (KIO) Ginjaw kawn tsun ai.

“Ya a ten Shanglawt mying hte ahkun hkanse hta sha ni shara shagu hta grai nga taw ai. Mare kahtawng masha ni mung shanglawt ni masat da ai tara shang ahkun gumhpraw rai/ n rai ga garan yu ra ai. Hta hkrawm ai ni mung tara shang Shanglawt magam gun rai/ n rai tsep kawp chye ra ai rai nga ai. N rai yang gaw anhte amyu sha ni hpe jahten mayu ai ni grai nga ai” nga Ginjaw kawn mying n tsun mayu ai salang langai tsun ai.

Wunpawng Mungdan Shanglawt Hpung (KIO) gaw tinang uphkang ai masat gaiwang kata na ja maw, lungseng maw ni hta ahkun tara shang bang shangun nhtawm bungli galaw sha na ahkang jaw da ai kata kaw myen asuya dap a dan tawk rim jawat ai lam, dingbai dingna jaw ai lam mung re nga ginra buga masha ni tsun ai.

Rim da ai Shanglawt magam gun yan hpe Myen asuya dap kawn dat ya na matu hpyi shawn da ai lam nga ai raitim, ya ten du hkra n dat ya shi ai lam KIO Manghkang Hparan Masit Hpung kawn Dukaba. Nhpang Naw Bu tsun ai.

Ya aten asuya dap ni gaw hpyen n-gun jat shara maden da nna Jinghpaw Mungdaw Myitkyina kawn jahtu dabang kaba ni nga ai Hpakan myu de sa ai lam mayan Myen asuya dap shagyit 15 n law htum jahkrat da nhtawm ahkun hkanse (snr) gumhpraw hpyi sha nga ai lam buhkawm masha ni tsun ai.


0 comments:

Post a Comment