Myen asuya dap KIO maga laknak kaba matut gap

Wunpawng Mungdan Shanglawt Hpung (KIO) ginra kata Myen asuya dap kawn laknak kaba ni matut gap bun nga ai majaw tsin-yam dabang 2 na mare masha ni hprawng yen hkawm ra mat nhtawm mungdan gadaga a garum ntum ai lam mung hkring nga ai lam KIO tsun shaga ahkang lu wa hte hpyen yen lakawn lanawn komiti kawn lit nga ai ni tsun ai.

Bat Kru Ya November 22 shana daw hta KIA Dap Ba (3) npu Dap Dung (15) ginra na Myen asuya dap Hk.M.Y Masat (437) kawn laknak kaba hte gap ai lam nga ai zawn, November 23 ya hta mung Laiza Muklum a sinna manga ang ai Hka Ya Bum, Hpun Pyen Bum hkan dung ai Myen asuya dap HK.M.Y Masat (389) hte Hk.L.Y Masat (56) dap hpung ni kawn laknak kaba hte 9 lang gap ai lam nga ai nga KIO a tsun shaga ahkang lu ai wa Salang Kaba Lah Nan tsun ai.

“Ya na zawn laknak kaba hte lang hte lang gap wa ai shaloi anhte maga n dang hkam nna bai n htang gap wa ai zawn galaw wa jang gaw shanhte majan nhpan hpe laja lana baw bang wa na re ngu ai masa wa pru taw ai. Rai timung ya gap taw ai gaw htaw deng 5, 6 tsan ai shara hkan na gap ai nga yang anhte maga mung dai ram tsan ai shara de n htang gap na matu ya yang masa n htuk taw nga ai. Shanhte gap wa timung anhte gaw nga taw na lam sha nga ai” nga Slgkb. Lah Nan kawn tsun ai.

Myitkyina-Manmaw lam ntsa na mare kahtawng ni hkan mung shana hkying 6:00 ten kawn shinggan n mai le na lam, shinggan le yang gap na nga Myen asuya hpyen dap kawn sadi jaw tsun ai lam ni nga ai majaw majan pa ngu masat ai zawn byin taw nhtawm hpyen masa hkyen maren ai lam re nga shi kawn tsun ai.

Nmawk ginwang daw Bum Kahtawng mare hte Mai Chyu mare kata hta Myen asuya a laknak kaba si hkrat ang ai majaw dai shara kawn deng 5 gang ai shara kaw nga ai N’Hkawng Pa tsin-yam dabang de koi yen mat na matu November 24 ya shani KIO Ginjaw kawn matsun jahkrat da sai nga KIO hpyen yen lakawn lanawn komiti ningbaw Salang Kaba Labang Doi Pyi Sa kawn tsun ai.

Bum Kahtawng hta htinggaw 30 daram hte Mai Chyu hta htinggaw 20 hkawt kawn yawm dik masha 200 jan nga ai lam shi kawn maram tsun ai.

“Ya laknak kaba hkrat ang ai nga yang daini gaw N’Hkawng Pa de htawt na tsun da ai. N’Hkawng Pa tsin-yam dabang hpe mung mabyin masa hpe yu maram nna sadi maja let nga na matu tsun da ai. Tsin-yam masha ni hkrit nga ai” nga shi kawn tsun ai.

2011 ning June shata hta Myen asuya dap hte KIO ni majan byin hpang ai Nmawk ginwang daw Sang Gang mare, Gauri Krung ginra maga kawn hpyen yen tsin-yam masha ni shingbyi nga ai N’Hkawng Pa tsin-yam dabang de yen mat sana rai nna dai dabang hta mi na tsin-yam masha 3,000 jan shingbyin nga chyalu re nga shi kawn tsun ai.

Laiza tsin-yam dabang ni gaw shim lam tsang ai majaw shinggan n le na matu matsun da ai lam Slgkb. Doi Pyi Sa kawn tsun ai.

“Myen asuya a laknak kaba dep lu ai shara ni hkrai re majaw tsin-yam masha yawng gaw shim lam n nga sai. Ya gaw asuya ni gap sha re. Anhte KIO ni gap ai n nga ai. Anhte gap dat yang majan mai byin na masa nga ai” nga matut tsun ai.

Myitkyina ginwang kawn Mungkan Wunpawng (UN) garum ntum uhpung uhpawng ni gaw October 27 ya kawn daini du hkra Laiza tsin-yam masha ni hpe lakawn lanawn arung arai ni madi shadaw la ra sai ngu tsun mat wa yu tim Myen asuya ahkang n jaw ai majaw du na December praw 3 hta she sa du sana re nga sit mat wa ai lam Slgkb. Doi Pyi Sa tsun ai.

November 19 ya shani Laiza Ginjaw makau Hka Ya Bum na Myen asuya dap kawn laknak kaba gap ai lam a majaw KIA Hpyen Du Shalat Jawng ma 23 si mat nhtawm hkala ningma kap ai marai 20 hpe mung daini du hkra Laiza Hpyen Tsi Rung hta aten la nna tsi tsi ya nga ai lam Slgkb. Lah Nan tsun ai.

Ya yang KIO Ginjaw gaw Myen asuya dap ni hpe sa gap ai lam n galaw na matu matsun jahkrat da ai raitim Myen asuya dap ni gap wa ai lam ntsa KIO kawn bai n htang gap dat jang gaw majan byin na matu asuya maga kawn ginjang tam nga ai lam shi kawn tsun ai.

KIA (Kachin) hpung ni hku nna npu na dap hpung ni hpe yu reng gawnhkang ai lam n nga sha ginra kata hpyen masa shuk shangun ai arawn alai ni shajat wa ai majaw dap dabang kawn laknak kaba hte bai n htang sadi jaw gap ai lam galaw ai hta KIA dap kata hkrat ang nna hkala nba hkrum ai lam ni nga mat ai re lam November 21 ya shani hpyen dap kawn laika shale da ai.

Posted in: SHIGA