Jak kaba hte ja htu sha bang nga ai majaw buga masha ni hkrit tsang nga

Hugawng Pa, Nam Byu ja maw hta mu lu ai Miwa gung-galang ja htu jak kaba

Jinghpaw Mungdaw Hpakan Ginwang Wa Ra Zup buga, Mugawng Hka hte Nam San Hka mawdaw lam mayan jak baw kaba ni hte ja htu ai lam a majaw shingra hka lam hten wa nhtawm mare buga masha ni tsin-yam tsindam hkrum wa na hpe hkrit tsang nga ai lam chye lu ai.

Mugawng Hka hte Nam San Hka mawdaw lam makau mayan hku hku gung-galang jak 60 jan gaw asuya hpe ahkun hkanse bang nna shani shagu n hkring n sa htu shalau sha nga re lam mare buga masha ni tsun ai.

Ja htu ai ni hpe hpareng ai ningbaw langai rai nga ai Shahtu Zup mare na Salang. Gumring Tu gaw mare kahtawng gaw sharawt lam nga nna Jinghpaw Mungdaw Hkringmang Daju kaw ahkaw ahkang hpyi la let htu sha nga ai raitim Shahtu Zup ginrun lahta tsang jawng kawng yu hte mawdaw lam lapran bilat kunkarit hte pe 60 daram nyep da ya ai hta lai nna laga hpa n nga ai lam Shahtu Zup mare masha langai tsun ai.

“Buga gaw sharawt ngu ai ga baw hte galaw ai nga gaw tsun ai raitim bawngring lam a matu hpa mung n mu shi ai” nga tsun ai.

Mawdaw lam maga na bum marawn ni hkan mung gung-galang jak 60 hta sha n ga laga ja htu jak 300 jan hte mung htu sha nga ai lam ja htu masha ni kawn chye lu ai.

Ja maw hta hpareng ai dabang up gaw Slg. Gumring Tu hte Slg. Zau Tawng, Miwa amyu sha Ah Yung hte Ah Chan ni rai nna jak baw kaba htu sha nga ai gung-galang jak ni gaw ‘Tahkyin-tsit’ ngu ai Lasang Awng Wa a Jinghpaw Me, Slg. Zahkung Ting Ying a kana Jan. Ying Myaw a Jewa company ni re lam chye lu ai.

Shanhte gaw shata mi ahkun bang ai hta pe 4 kaba ai dagawt ai baw shakap ai gung-galang jak a matu ahkun hkanse dap de chyat sen 5, pe 2, pe 3 a matu chyat sen 3 bang nga nna Wa Ra Zup mare uphkang du wa hpe sen 10, Danai D.K.Ts hpe sen 15, Kamai balik dap hpe sen 5, Dumbang Ts.Y.Hp hpe sen 4, Kamai SB hpe sen 2, Hpakan L.W.K hpe sen 10 hte Hpakan myu-ne mu hpe hkrum yang hkrum ai zawn sen 10 grupyin jaw sha ra ai lam ja htu masha ni kawn chye lu ai.

Dai zawn Mugawng Hka hte Nam San Hka mawdaw lam makau hku hku jak baw kaba ni hte shani shana shalau sha nga nna madung lwi nga ai hka lam mat mat nhtawm hka kaba wa ai lam ni byin wa ai majaw mare kahtawng ni hka lim wa mai ai masa nga ai nga ginra buga masha ni tsang nga ma ai.

Dai hte maren manu mana kaba ai htu sha dabang a majaw shingra nhprang sut rai ni hten-za mat ai hta sha n ga shawa masha ni hta mung machyi hkrum wa chye ai lam Jinghpaw Wunpawng Bawngring Mahkri Shawn Hpung (KDNG) amu madu Slg. Tsa Ji KNG Jinghpaw Shiga Dap de tsun ai.

“Shingra maka hte makau grupyin hpe ahtu hkra wa na. Dai ginra kaw nga ai num sha ma ni ahkyang lailen hten za wa na. Ya garu nga ai.. pat jasan nga ai nanghpam tsi mawan ni jawng ai shara tai wa na. Masha shabyak ni law wa na. Dai majaw mare buga masha ni a matu grai tsang ra ai” nga tsun ai.

Shingrai ja htu ai lam hte seng nna Jinghpaw Mungdaw Hkringmang Daju. Lajawn Ngan Seng gaw 2011 ning hta gung-galang jak ni hpe dawm kau na matu pat hkum ai lam nga sai raitim tang-du hkra ahkyak la sa wa ai lam n nga ai maga mi hta htu shalau sha ai lam ni gaw matut nna jat bang wa ai lam re hpe chye lu ai.

Dai gung-galang jak ni gaw 2006 ning kawn Hugawng Pa ginra hta Yuzana company maden shang wa ai ten kawn htu sha ai lam ni hpe manu mana kaba hkra galaw sha bang wa ai re lam chye lu ai.

Posted in: SHIGA