Hugawng Pa e Yuzana Company nga nga ai hpe ginra masha ni n ra

Hugawng chyauman masha ni Yuzana company hpe n ra ai lam, me sin-dan-pa jaw nga yang.

Jinghpaw Mungdaw Hugawng Pa ginra Lidu lam mayan na mare 2 kawn kahtawng masha ni October praw 8 ya shani e Yuzana Company nga nga ai hpe “ra/n ra” shawa myitra me hta ai hta 98 tsa htam shadang gaw n ra sharawng ai lam ninghkap me shinggyin la lu ai nga chye lu ai.

Hugawng Pa dusat du myeng nam kawn, shingra maka hte magup sumhpa gawnhkang lam masat gaiwang gaw 6,708 s/q miles re lam pyendau ni shara shagu hta noi tawn ai raitim kaja wa nga yang eka sen 4 jan maden la da ai nga ginra buga masha ni tsun ai.

Dai majaw Lidu lam makau na kahtawng kawn Nawngmi mare hte Shahtu Zup mare kawn yi sun galaw masha ni gaw shawa masha chye lu hkra myit ra me hkamla nna Nawngmi mare kawn me yawng 857 hta ninghkap me 852, madi shadaw ai me 1 hte shaprai me 4 shinggyin la lu nna Shahtu Zup mare kawn me yawng 284 hta e ninghkap me 282 hte shaprai me 2 hpe shinggyin la lu nhtawm madi shadaw me n lu ai lam ginra buga salang ni kawn chye lu ai.

Yuzana company shang bang wa ai kawn dai ni du hkra ginra masha ni mayak mahkak shani shanang hkum sha nga ten dai zawn tinang a myit ra hkamla lam hpe htawng madun lu ai majaw mung ginra buga masha ni myit dik n-gun lu ai lam kahtang masha langai tsun ai.

“Daini anhte yi sun galaw sha ai ni ndai zawn Yuzana company ‘ra/n ra’ madu myit ra me bang lu ai grai kabu ai” nga me bang ai wa; sun galaw masha langai KNG Jinghpaw Shiga Dap de tsun ai.

Dai kahtawng lahkawng gaw ten langai mi hta sha kalang dat me sutdek ni hte hta shinggyin ai rai nna Lidu lam mayan na yi sun galaw masha ni a myit ra hte myit hkum mangrum galaw ai re lam Nawngmi buga na salang ni kawn chye lu ai.

Ngam ai kahtawng ni mung dai zawn myit ra me hta shinggyin sa mat wa na lam nga nna yi sun hkauna machyi hkrum mat ai mare masha ni hku nna matut nna Shiga Dap Sanglang Hpawng ni galaw mat na re lam Nawngmi ginra e myit ra me hta ai hta tsun shaga ahkang lu ai wa; Slg. Hkun Sa kawn KNG Jinghpaw Shiga Dap de tsun ai.

Dai Hugawng Pa ginra Lidu lam mayan na kahtawng 11 a yi sun hkauna ni hpe Yuzana kawn zing madu da nna dai sun ni hta Nai Kadung ni hkai nga ai lam gaw 7 ning rai sai lam chye lu ai.

Company a nai kadung rin ntsin ni a marang makau mayan na kahtawng ni de manam shagram byin nhtawm hkam ja lam hpe ahtu hkra shangun nna kahtawng masha ni gaw yi sun sa na matu myit shuk nga let hkam kaja lam a matu mung hkrit tsang nga ai lam mare masha ni tsun ai.

Lidu lam mayan na Yuzana company zing madu da ai kahtawng 11 gaw Nawngmi mare, Wa Ra Zup mare, Awng Ra mare, Nam Sheng mare, Tsan Pya mare, Tingkawk mare, Ban Kawk mare, Shahtu Zup mare, Laja Pa mare hte Nam Hpup mare ni re lam chye lu ai.

Dai zawn Yuzana company nga nga ai lam hpe ginra masha ni kawn ‘ra/n ra’ hte seng nna myit ra me hta shinggyin ai lam hpe lai wa sai September 22 ya shani mung Wa Ra Zup mare, Ban Kawk mare, Yuzana Tsan Pya mare, Nam Sheng mare hte Awng Ra mare ni hkan e hta shinggyin mat ai hta 97 tsa htam shadang gaw ninghkap me ni hkrai rai mali ai.

Posted in: SHIGA