Friday, October 17, 2014

Sam mung hta Myen asuya dap hte FUA Daphpawm lapran laja lana gasat poi byin nga


Myen asuya dap hte Munghpawm Hpyendap (Federal Union Army--FUA) lapran Sam mung sinpraw dingdung maga, lai wa sai lahkawng ya kaw nna laja lana gasat poi byin nga sai lam chye lu ai.

Oct 15 bat Masum Ya shani kaw nna Tamungne a sinpraw, Mung Ji ginwang hta asuya dap hte amyusha hpyen masa mungmasa daphpawm (UNFC) npu Munghpawm Hpyendap (FUA) lapran gasat poi ni shani tup ngu na byin nga ai lam, daini mung matut byin ai lam, majan ginra makau kaw du nga ai Jinghpaw Wunpawng Hkalup Hpung Ginjaw (KBC), hpyen yen garum ntum sara Zau Seng tsun ai.

Sara tsun ai hta, “Majan byin ai Mung Ji ginwang kaw re. Myen asuya dap maga Tatma 11 hte 55 re. E… tat-pawng-tsu hte byin ai re.. Federal Union Army… FUA nga mying jaw tawn da ai.”

Ya na zawn asuya dap hte daphpawm maga uhpung masum--- KIA Dapba 4, MNDAA Kokang dap hte TNLA Balawng Dap, ni gaw lai wa sai lahkawng ya kaw nna shani ting ting majan byin nga ai lam hpe
Lahta Sam mung KIA Dapba 4 na Dukaba Zau Maw KNG Jinghpaw Shiga Dap de tsun shateng ai.

Ndai majan byin ai shara gaw Wa mung (UWSA) hte Sakhkung Hka sha din ai shara rai nna, KIA Dapba 4 npu Dapdung masum--- 2, 9 hte 38 ni a jarit mung re lam chye lu ai.

KBC garum ntum sara Zau Seng tsun ai hta, mana maga byin ai majan hta mung masha marai 3 sinat pala hkra mat ai lam, shanhte masum hta 1 gaw tsirung du nga sai rai nna ngam ai 2 hpe daini Mung Ji kaw nna Kuthkai de htaw yu wa ai lam kaw naw re lam tsun ai.

Lahkawng ya byin ai majan hta daphpawm maga si hkala lam nga ai lam, raitim asuya maga grau law na re lam hpe Dukaba Zau Maw tsun ai.

Ya ten Myen hpyendap gaw Kuthkai a sinpraw maga Dapnu Masat 11 hte 55 hpe jahkrat tawn nhtawm Kuthkai a sinna maga gaw Dapnu Masat 88 hpe jahkrat nna, dai ginra ni hta nga nga ai Jinghpaw, Sam, Balawng, hte Kokang rawt malan hpung ni hpe shamyit na majan baw nga sai re lam, sagawn chye lu ai re.

Lai wa sai September 22-26 hta UNFC npu mungdan ting madang gap hkat jahkring bawngban jahkrup hpung NCCT hte asuya munghpawm simsa lam hkrang shapraw komiti UPWC lapran Yangung kaw bawngban ai shaloi, NCCT kawn tang madun ai munghpawm hpyendap hpaw na lam hpe Tatmadaw hpyendap gaw n hkap la ai lam tsun mat sai re.

Dai hpang Karen, ‘Sam hte Jinghpaw mungdaw ni hta asuya dap a htu gasat ai lam ni law wa ai majaw dai sat lawat gaw ya galaw nga ai gap hkat jahkring bawngban lamang hten mat na tsang ra ai majaw, ya jang jahkrit kau ya na’ hpe UNFC gaw Oct. 15 ya shani ndau shabra laika hte asuya hpe hpyi lajin dat sai re.

Raitim asuya maga hpyen masa jahkring tawn ai lam n nga ai sha n ga, grau she hpyen n-gun jat ai, hpyen masa jahte tam ai sat lawat hpe yu yang ‘asuya gaw teng sha simsa lam hpe n ra ai’ nga nna Laiza ginjaw na KIO manghkang hparan masit komiti malawm Dukaba Nhpang Naw Bu tsun ai.


0 comments:

Post a Comment