KIA Dapba 4 laknak ap na, Myen Dap Awn Daju tsun ai hpe ginra masha ni n hkap la

Munggu ginra na KIA Dapba 4 hpyenla ni

Lahta Sammung KIA Dapba 4 laknak dawm na matu Myen mung asuya hpyendap Dap Awn Daju Dkb Min Awng Lai tsun mat ai hpe ginra buga masha ni n hkap la ai lam, tsun shapraw dat masai.

KIA Dapba 4 gaw “Wunpawng Mungdan Shanglawt Hpyendap (KIA) hte kaga ga n re ai zawn jarit matut ai Jinghpaw mungdaw mungmasha ni hte mung langai sha gahkyin gumdin let htunghking, makam masham, labau rum nna arau yu hkrat wa ai ni re lam” August 27 ndau hta shaleng ai re.

August 25 ya Myen asuya n-gup Myanma Ahlin Shi Laika hta, “MNDAA (Kokang) hpe garum ai KIA Dapba 4 hte TNLA (Balawng) ni laknak dawm ra na re lam” hpe Myen dap awn daju Dkb Min Awng Lai gaw Myen Mung Shi Kongsi (gan) ningtau ningbaw Slg. Hkin Mawng Le hte Naypyidaw Ba-yit-nawng manam jarawp gawknu e Aug. 24 ya shani hkrum ai shaloi, tsun ai re.

Ndai gaw, “Lahta Sammung hta nga ai KIA Dapba 4 hpe ginhka ai masa rai nna, lama NCA simsa lam sen htu ai shaloi Dapba 4 gaw n lawm na lachyum re lam” ndau shabra laika shapraw ai hta woi awn shanglawm ai Sara Htoi Awng tsun ai re.

Sr. Htoi Awng tsun ai hta, ndai ndau shabra laika hpe Lahta Sammung Namtu, Kutkai, Nampaka, Sinli, Munggu, Muse hte shara shagu na buga kanu wa ni hte hkrum tsup bawngban nna shapraw ai re nga tsun ai.

Lai wa sai 17-ning simsa lam aten ladaw e mung dai ten na Myen hpyendap asuya gaw KIA Dapba 4 hpe Jinghpaw mungdaw de dawm la kau na matu lang hte lang tsun shadut wa sai. Dai hpang, Myen hpyendap a mara kata KIA hpyenla ni hpe majoi sat sharu ai mabyin kaba 2 mung pru wa sai re.

2011 ning Myen asuya hte KIO lapran majan byin wa ai hpang, KIA Dapba 4 daju Loikang hkrat ai hpang daju hpe Jinghpaw mungdaw Mai Ja Yang de htawt la ai raitim Dapba npu hpyendap ni gaw Lahta Sammung e naw nga nga ai re.

Ya bai KIA Dapba 4 laknak dawm na tsun wa ai majaw ya ten shakut nga ai NCA mungdan ting gap hkat jahkring ga sadi sen htu na lam hta dingbai dingna byin wa chye ai lam, ndau hta Lahta Sammung buga masha ni tsun tawn ai re.

Asuya hte NCA sen htu ngut ai hpang amyu sha rawt malan hpung ni laknak n mai lang sana re lam hte Disarmament, Demobilization and Reintegration (DDR), Security Sector Reform (SSR) ngu ai hpyendap hte seng ai lam ni hkrang shapraw wa na re lam hpe Myen Dap Awn Daju gaw August 19 ya shani Inglik mungdan (UK) a Myen mung hte seng ai sumtsan dat kasa rung Salang Andrew Patrick hte Naypyidaw e hkrum ai shaloi tsun wa sai re.

NCA ginchyum dat na lam hte seng nna, amyusha rawt malan hpung ni maga uhpung kaba manga na ningbaw ni hte SD lahta tsang salang masum gaw Myen gumsan magam Slg. Ting Tsing hte Dap Awn Daju Dkb Min Awng Lai, yan hte du na September praw 9 ya shani Naypyidaw e hkrum na re.

Myen asuya gaw rawt malan hpung nkau hpe ngam da nhtawm uhpung 15 hte shawng NCA sen htu na hkap la tawn ai re. Myen asuya hte hpyen majan shayawm na myit hkrum sen htu tawn ai KIO gaw, NCA hta rawt malan hpung yawng n lawm yang sen htu na n re lam ndau tawn ai re.

Posted in: