Sumprabum ginwang kata KIA hpe majan baw gasat nga ai Myen hpyendap gaw
hpyen yen (IDP) ni nga ai mare de mung laknak kaba ni gap bang ai majaw,
hpyen yen ni kahtap nna laknak kaba n dep ai nam de hprawng yen nga ai
re.
Tinang KIA Dung 7 hte July 31 ya shani Mali Yang hta byin ai
majan e Myen hpyen ni gaw Mali Hka sha din ai Ja Ra Yang de laknak kaba
ni gap bang wa sai lam, KIA Dapba 1 salang ni KNG Jinghpaw Shiga Dap de
tsun shateng ai.
Raitim hpyen yen hte mare masha ni hkala nba n nga ai lam, Dapba 1 salang ni tsun ai.
Myen
hpyen ni gaw Ja Ra Yang mare de masha hkawm lai ai mu shagu 81mm laknak
kaba gap shatsang nga ai lam, KIO/KIA ginjaw Laiza na Myen-KIO Ginrun
Manghkang Hparan Jasan Komiti malawm Du Kaba Nhpang Naw Bu tsun ai.
Dai re majaw ya ten hpyen yen hte mare masha ni yawng Myen hpyen laknak kaba n dep ai nam de hprawng yen nga ai lam chye lu ai.
Ja
Ra Yang mare lahta Nhtan Zup mare hta hpyen yen ni law malawng du nga
ai rai nna, dai dabang de gaw Myen hpyen laknak kaba gap bun ai lam
garai n nga shi ai hpe Dapba 1 salang ni hku nna chye lu ai.
Myen
hpyen ni gaw Mali Yang mare shinggan KIA Dung 7 a post hpe July 15 ya
shani zing la ai re. Dai hpang bat lahkawng jan, August praw 1 ya hta
Mali Yang mare hpe kahtap zing nna mare grupyin e hpyendap shara jahkrat
nga sai lam, Du Kaba Nhpang Naw Bu tsun ai.
Ndai gaw 2011 ning
majan ningnan byin wa ai ten tinang dap ni yen kau ai majaw KIA ni galai
dung mat ai mare hpe Myen hpyen ni bai madu la lu ai lam mung rai nga
ai.
Ya ten, masha n nga ai Mali Yang mare hta Myen hpyen n-gun
300 jan hte rau Myitkyina daju Myen hpyendap dingdung daw daju M.P.Hk na
byu-ha-mu wa nan du nga ai lam, KIA ni maram tawn ai re.
Mali
Hka hku, Sumprabum mare a sinpraw maga deng 8 jan (lagaw lam hku deng 20
daram) hta nga ai Mali Yang mare gaw KIA Dung 7 ginra Mali Hkrang
Walawng de lai rap shara jakli daru chyinghka rai nna, Myitkyina-Putau
jakli matut mahkai lam hta ahkyak ai hka daru langai mung re.
Lai
wa sai June 24 ya kaw nna Mali Yang hta byin hpang wa ai majan a majaw,
hpyen hprawng nga ai Sumprabum ginwang kata mare kahtawng ni gaw Mali
Hka a sinna hkran maga na kahkawng (5) --- Lawt mai Yang, Hpung Ing
Yang, Mali Yang, Zup Ra Yang, Sama Bum hte Mali Hka a sinpraw hkran maga
na kahkawng (2) --- Ja Ra Yang hte Nhtan Zup mare ni re.
Ndai
mare (7) na hpyen yen ni yawng 1,219 re lam Dapba 1 jahpan hte maren
chye lu ai. Shanhte hpe ya ten du hkra gaw Jinghpaw Wunpawng Hkalup
Hpung Ginjaw (KBC) kaw nna sha, mai byin ai made malu masha hte tsi
mawan ni garum jaw nga ai lam sagawn chye lu ai.
M.P.Hk Myen
hpyendap daju gaw Myitkyina-Putau Mali Hka jakli lam hpe June 29 ya kaw
nna ya ten du hkra pat tawn ai re. Dai re majaw hka lam hku nna hpyen
yen garum ntum alaw ala shalai jaw na matu yak hkak nga ai lam chye lu
ai.
Maga mi de Myitkyina-Sumprabum mawdaw lam hku gaw ahkang jaw
ai raitim, ya ten Lanam Ta lam n kaja ai majaw garum ntum aten dep shadu
ya na gara hku mung n mai byin ai lam, chye lu ai.
0 comments:
Post a Comment