NCA simsa lam sen htu na ntsa, KIO ginjaw zuphpawng galaw nga

KIO ningbaw malai Du Kaba Nban La

Myen mung asuya hte, NCA simsa lam sen htu na hte seng nna Laisin Bum e lai wa sai bat kaw nna Wunpawng Mungdan Shanglawt Hpung (KIO) ginjaw salang ni zuphpawng galaw nga sai re.

Nationwide Ceasefire Agreement (NCA) ngu ai mungdan ting gap hkat jahkring ga sadi (nhprang) hpe shangut ai ‘sen htu na lam’ ntsa NCCT hta shanglawm ai rudi amyusha rawt malan hpung 16 ningbaw ni ndai shata n htum shi laman dawdan ai lam garai n galaw shi yang, ya na zawn KIO ginjaw zuphpawng galaw ai lam re.

NCCT a gawng malai, Karen National Union (KNU), Karenni Progressive Party (KNPP), New Mon State Party (NMSP), Kachin Independence Organization (KIO) hte Shan State Progressive Party (SSPP) na ningbaw ni gaw Myen asuya ningbaw ningla ni hte du na bat Yangon e hkrum ai shaloi, NCA hpe ‘sen htu na n htu na’ lama mi gaw dawdan ra sana re lam, UNFC rudi amyusha hpyen masa mungmasa daphpawm a ningbaw hte KIO ningbaw malai mung rai nga ai, Du Kaba Nban La, August praw 5 Htai mung Chiang Mai mare Jinghpaw mungshawa sanglang hpawng e tsun wa sai re.

Lama NCA sen n htu yang Myen hpyendap gaw, shajin da sai hte maren KIO hpe n-gun kaba hte maja majan baw gasat wa ai shaloi tinang maga Laiza, Mai Ja Yang ni hpe makawp maga na n mai byin ai hte n-gun grai ginlut mat wa na masa nga ai lam, bai maga mi mung NCA sen htu yang grau tsang ra ai gaw tinang uhpung kata shada hprai shai hkat na lam ni re” nga, Du Kaba Nban La tsun ai re.

Ya Myen mung a shawnglam a matu ‘mungmasa lam braw’ ngu na kaw du nga ten, KIO ginjaw gaw NCA hte seng nna dawdan ai lam n galaw shi yang tinang Jinghpaw Wunpawng amyusha ni hte mung bawngban ningmu la ai lamang ni galaw nga ai re.

Ndai ten, Laiza muklum na KIO magam dap rung ni hpe Laisin Bum de htawt la ai majaw muklum kata katsi katsang byin nga ai lam, buga masha ni hku nna chye lu ai.

NCA Hkam Dahka Nau N Nga

NCA gaw shawnglam mung masa jahta sa wa na lam hta hkam dahka n nga ai lam hpe KIO ginjaw mu mada hkam la tawn ai re.

Lam yan 7 lawm ai NCA (nhprang) hpe asuya Munghpawm Simsa Lam Hkrang Shapraw Komiti (UPWC) hte 2013 ning Laiza zuphpawng kawn hpaw shabawn dat ai NCCT, yan jawm ka ai re.

Raitim dai ga sadi nhprang hta shawng e rawt malan hpung ni ra ai lam ni lawm wa sai, dai hpang ya jahtum shangut na kaw asuya ra ai maga hku mahtang dun ahkye mat ai lam, Du Kaba Nban La Chiang Mai mungshawa sanglang hpawng e tsun ai re.

NCA gaw asuya ra ai hku rai mat ai raitim, NCCT hpung shang uhpung ni hku nna gaw jahtum hku nna lam yan masum hpe myit hkrum yang sen htu na re lam, asuya hpe lajin tawn ai re.

Dai lam ni hta, asuya hku nna “dap hpaw shabawn madang n nga ai” ngu n hkap la tawn ai NCCT malawm uhpung kru—Wa National Organization (WNO), Lahu Democratic Union (LDU), Arakan National Council (ANC), Ta'ang National Liberation Army (TNLA), Arakan Army (AA), Myanmar National Democratic Alliance Army (MNDAA, Kokang Army) hpe hkap la na matu re.

Bai, sen htu na kaw asuya maga UPWC salang ni n re sha, mungdan gumsan magam hte ningtau gumsan magam yan, rapdaw lahkawng a ningbaw yan hte dap awn daju, htu ra ai lam hpyi da nna, maigan sakse mungdan hku nna US, UK, Norway, Htai, Miwa, Gala hte Japan ni hpe shalawm na matu hpyi da ai re.

Raitim asuya gaw UN, Miwa hte ASEAN ni hta lai ngam ai n hkap la ai lam chye lu ai.

Myen mung a dingdung daw, UWSA hta lai n-gun kaba dik KIO gaw, hkam dahka n nga ai simsa lam hpe kalang bai Myen mung asuya hte sen htu na n re lam tsun tawn ai re.

Posted in: