NCA jahkrup nga ten Myen hpyen ni KIA post langai kahtap zing

Mali Hka de nga ai KIA Dung 7 shawnglam post langai

Myen asuya hte amyusha rawt malan hpung ni lapran, mungdan ting gap hkat jahkring ga sadi NCA sen htu shangut na jahkrup nga ten, Myen asuya dap gaw Mali Hka hku Wunpawng Mungdan Shanglawt Hpyendap (KIA) a shawnglam post langai hpe kahtap zing madu kau dat sai re.

Myen hte KIA Dapdung 7 lapran masum ya laja lana gasat poi byin ai hta, hpyen ni maga n-gun grai kaba ai majaw August 26 ya shana hta Nkrung Tu Bum post hpe yen kau ya sai lam, KIO/KIA Ginjaw Laiza na Myen-KIO Ginrun Manghkang Hparan Masit Komiti malawm Du kaba Nhpang Naw Bu tsun shateng ai.

Ndai post gaw, Mali Hka a sinna hkran de nga nna majan a majaw kahtawng masha ni hprawng shakram kau ai Lawt Mai Yang a ntsa, ya ten Myen dap ni dung ai Mali Yang mare a lahta e nga ai re.

Dum nta htinggaw 40 jan nga ai Lawt Mai Yang mare hta KIO ninghtawn rung, hpaji jawng hte tsi jaw gawk ni mung nga ai lam chye lu ai re.

Sumprabum ginwang Mali Yang ginra hta June 24 ya kaw nna Myen asuya dap hte KIA Dung 7 lapran majan byin nna, Dung 7 a Mali Yang post hpe July 15 hte mare hpe July 31 ya ni hta zing ai re.

Matut nna, Myen ni gaw Mali Yang mare a lawu hte sinpraw maga Mali-Hkrang Walawng ginra ht nga ai KIA Dap ni hpe mung gasat zing wa mai ai lam, hpyen masa yu maram ai ni tsun nga ai re.

Myen hpyendap gaw masing hte maren, jet gasat nbungli, laknak kaba ni hte hpyen n-gun kaba, tat-yin (dapdung) 20 daram na hpyen n-gun tsa kaba jai lang nhtawm majan baw gasat nga ai ten, maga mi de KIA maga dapdung madang hku sha hkap shingla gasat nga ai majaw, ya na zawn tinang shawnglam post ni yen kau ra ai re lam, Laiza ginjaw na du salang ni tsun ai re.

NCA sen htu ai hta amyusha rawt malan hpung yawng shanglawm na gabaw hte seng nna, rawt malan hpung kaba manga na ningbaw ni hte yawng marai 8 shanglawm ai lahta tsang dat kasa hpung gaw, Myen gumsan magam Slg. Ting Tsing hte Dap Awn Daju Du Kaba Min Awng Lai, yan hte du na September praw 9 hta Naypyidaw e hkrum na re.

Ndai chyum tari zuphpawng e jahkrup la lu yang NCA sen htu na rai nna, lama n lu jahkrup yang mi na raw (sen n htu ai) rai na re lam, Mon NMSP a ningtau ningbaw Slg. Nai Han Ta tsun ai re.

August 19 ya shani Myen Dap Awn Daju Du Kaba Min Awng Lai gaw Inglik mungdan (UK) a Myen mung hte seng ai sumtsan dat kasa rung, Slg. Andrew Patrick hte Naypyidaw e hkrum ai shaloi, NCA sen htu ngut ai hpang, amyusha rawt malan hpung ni laknak n mai lang sana hte DDR, SSR ngu ai laknak dawm ai masing hkan sa ra na re lam tsun shapraw dat sai re.

Posted in: