KBC: “mungshawa hte KIO rau n rai sana re”

KBC, J.W Hkalup Hpung Ginjaw Rung, Myitkyina

Lama na, Wunpawng Mungdan Shanglawt Hpung (KIO) gaw Myen mung asuya hte NCA simsa lam sen htu yang, “mungshawa hte KIO rau n rai sai ngu hkam la ra na re lam”, Jinghpaw Wunpawng Hkalup Hpung Ginjaw (KBC) gaw asan sha tsun sadi jaw dat sai.

August 17 ya shani Laiza Padang Gawknu hta, NCA ngu ai Mungdan Ting Gap Hkat Jahkring Ga Sadi hte seng nna KIO ningbaw Malai Du Kaba Nban La hte Ninggawn Amu Madu Dr. Lahkyen La Ja, yan woi awn nna mungshawa sanglang-ningmu la ai zuphpawng hta, ya na zawn KBC ningbaw ni sadi jaw dat ai re.

NCA hpe mungshawa ni kadai mung myit n hkrum ai kaw htu yang “mungshawa hte KIO gaw ga-ang hkup..ga-ang hkup hpra rai mat sana re. Mungshawa hte KIO gaw rau n nga sai..rau n rai sai ngu sawn la ra na re lam” J.W nawku hpung ni hta kaba dik, Myitkyina KBC ginjaw magam gun ningbaw ni sadi jaw dat ai re.

NCA ga sadi nhprang hpe Myen asuya UPWC hte NCCT amyusha rawt malan hpung daphpawm, yan jawm ka ai raitim, jahtum daw asuya ra ai hku gang dun mat ai majaw shawnglam mungmasa jahta sa wa na hkam dahka n nga ai.

Lai wa sai ten, KIO gaw tinang woi awn hpaw ai NDF (National Democratic Front) daphpawm na pru nna, KNU ni ja ja pat hkum ai kata, 1994 ning hta dai ten na Myen hpyendap asuya hte simsa lam lakmat htu sai re.

Dai hpang mung, Myen mung democracy ra sharawng ai wuhpung wuhpawng ni hte tinang dap shawa mungshawa ni ninghkap nga ai lapran, hpyendap asuya woi galaw ai Amyusha Mungbawng Zuphpawng (NC) hta htum hkra lung nna dai kawn pru ai 2008 gaw da ai tara hpe mung madi madaw ya sai re.

Ya ten, Jinghpaw mungshawa hte wuhpawng wuhpawng ni gaw hkam dahka n nga ai NCA hpe n hkap la ai lam tsun nga ai aten, KIA dap shawa a ningmu gaw gara maga tsap na re lam n chye lu shi ai.

Hpyendu dingsa gumsan magam Slg. Ting Tsing asuya gaw du na Nov. 8 ra lata poi n du shi yang, NCA hpe sen htu shangut na matu rawt malan hpung 15 hpe August 11 ya nhtoi laika hte kahtap tsun shadut dat sai re.

Ndai lam ntsa, rawt malan hpung ni maga gaw Htai mung Chiang Mai mare hta August 21-23 ya hkrum ra zuphpawng galaw nna NCA ntsa dawdan sa wa na re. NCCT malawm ni gaw ‘rau jawm myit hkrum dawdan sa wa na hkrang’ hta ningpawt tawn ai re. Raitim, wuhpung mali--- the Karen National Union (KNU), the Democratic Karen Benevolent Army (DKBA), the Kachin Peace Council (KPC) hte the Restoration Council for Shan State (RCSS) ni gaw August praw 3 ya shani Naypyidaw e gumsan magan Ting Tsing hte lagu hkrum nna, NCA hkap la sen htu na re lam hpe August 17 ya shani ginrun ndau dat sai.

Ning re ai aten, KIO ginjaw salang ni yawng ngu na gaw NCA sen htu mayu ai ni hkrai re lam, maigan daju Jinghpaw Wunpawng Amyusha Hpung, KNO Ningbaw Duwa Bawmwang La Raw gaw KNG Jinghpaw Shiga Dap de tsun wa sai re.

KIO ginjaw salang ni gaw “tinang mungshawa ni machyi wa ai baw anhte n galaw na ga ai” nga timung, KIO hku nna NCA sen htu kau na ntsa mungshawa ni a myit tsang ai lam ni gaw grau grau law htam nga sai re.

Posted in: