Myen asuya dap pat da ai kata garum ntum jaw na lam n hku mat ai majaw, Mali-Hkrang Walawng na hpyen hprawng masha ni yak hkak hkrum nga ai lam chye lu ai.
Ya Lanam Ta ten madung matut mahkai lam Myitkyina-Putau Mali Hka jakli lam hpe Myen hpyendap kaw nna pat da nga dingyang re majaw Maduk Yang hte Salang Yang, dabang lahkawng hta du nga ai hpyen yen ni malu masha, tsi mawan hte kaga lam shagu hta yak hkak ai lam re.
Bai nna, Mali Yang hta dung ai Myen hpyen ni gaw KIA Dung 7 ginra hka sha din ai Ja Ra Yang de sinat kaba ni jahkring hkring gap ai majaw mare masha ni shimlam n nga byin nga ai lam, Laiza na Myen-KIO ginrun manghkang hparan masit komiti malawm Du Kaba Nhpang Naw Bu tsun ai.
Shawng July 31 ya hta mung, shawng e hpyen ni du nga ai lawu lahta mare lahkawng--- Ja Ra Yang hte Nhtan Zup de Mali Yang na Myen hpyen ni sinat kaba majoi gap sharu bun wa sai majaw hpyen yen ni Maduk Yang hte Salang Yang de kahtap hprawng ra mat ai re.
Ya ten dai dabang lahkawng hta kahtawng (7) na hpyen yen 1,400 jan du nga ai rai nna shanhte hpe Jinghpaw Wunpawng Hkalup Hpung Ginjaw KBC kaw nna mai byin ai ladat hte n law la ai malu masha garum ntum ni gam jaw nga ai re.
Myen hpyendap gaw Sumprabum a sinpraw maga KIA Dung 7 a Mali Yang post hpe June 24 ya shani majan baw gasat dat ai hpang, KIA a malu masha ginlen lam dan di ai hku nna, June 29 hta jakli lam pat tawn ai re.
Mali Yang hpyen yen ni hpe garum ntum jaw na lam ntsa, KBC woi awn let Myitkyina e nga ai UN Mungkan Wunpawng hte kaga asuya n re ai garum ntum uhpung uhpawng ni hpe zuphpawng shaga bawngban yu sai raitim, shanhte kadai mung myit n lawm ma ai lam, KBC tsun ai re.
0 comments:
Post a Comment