NCA hte seng nna Chiang Mai e bawngban nga

NCA sen htu na matu KNU hte nkau dawdan sai ten, KIO hte ngam ai ni mung dawdan na kun?

NCA Mungdan Ting Gap Hkat Jahkring Ga Sadi hpe Myen asuya hte sen htu shangut na lam ntsa mani August 21 ya kaw nna Htai mung Chiang Mai mare e amyusha rawt malan hpung ni zuphpawng galaw nga sai re.

Zuphpawng e NCA sen htu ai hta “yawng lawm n lawm gabaw” hta madung dat bawngban nga ai re. Raitim myit hkrum ai lam garai n lu shi ai.

Ndai zuphpawng hta KIO maga Ningbaw Malai Dkb Nban La, Ninggawn Amu Madu Dr. Lahkyen La Ja, Dkb Ji Nawng, Slg.Kb Wawhkyung Sin Wa hte Gawlu La Awng, ni sa du shanglawm ai re.

Myen asuya gaw, shi hte munghpawm madang snr mungdaw madang gap hkat jahkring tawn sai amyusha rawt malan hpung 14 hte hpyen majan shayawm na myit hkrum tawn ai KIO, yawng pawng wuhpung 15 hte NCA sen htu mayu ai re.

NCCT amyusha rawt malan hpung daphpawm hku nna gaw ngam ai kaga wuhpung (6) --- WNO (Wa), TNLA (Balawng), AA hte ANC (Rahkai), MNDAA (Kokang) hte LNU (Lahu) hpe mung NCA sen htu ai hta shalawm mayu ai raitim asuya n hkap la shi ai.

Ndai ten KNU (Kayin), DKBA (Kayin), KPC (Kayin) hte RCSS (Sam) ni gaw, NCCT a hkrang hte nhtan shai nna, NCA sen htu na myit hkrum dawdan sai lam ginrun ndau hpe August 17 ya shani shapraw dat sai re.

NCA sen htu na lam hte seng nna KIO hku nna gaw ndai zuphpawng a mahtai hku na mahtang sa wa na masa maram lu ai re.

KIO gaw NCA sen htu na hpe J.W nawku hpung ni hta kaba dik KBC hte mungshawa ni ja ja ninghkap tawn ai re.

NCA sen htu byin na n byin na gaw, hpawt ni jahtum galaw na amyusha rawt malan hpung ni a ndai Chiang Mai zuphpawng a “yawng snr nkau” gara hku matut sa wa na dawdan ai hta, grai madung na masa nga ai re.

Posted in: