Myen mung asuya hte, NCA ngu ai Mungdan Ting Gap Hkat Jahkring Ga Sadi hpe Wunpawng Mungdan Shanglawt Hpung KIO kaw nna hkap la let sen sa htu kau na hpe Jinghpaw Wunpawng mungshawa ni myit tsang nga ai re.
Mani KIO ginjaw Laiza e KIO ningbaw malai Du Kaba Nban La hte Ninggawn Amu Madu Dr. Lahkyen La Ja yan lit la nna, NCA hte seng nna mungshawa ni hpe sanglang dan ai ningmu la ai zuphpawng kaba galaw ai re. Dai hta du sa ai shawa masha ni yawng ngu na gaw ‘NCA sen htu kau na myit tsang ai lam’ tsun wa sai lam, zuphpawng du sa ai ni tsun ai.
Ndai Padang Gawknu mungshawa zuphpawng hpe lani mi sha galaw na hkyen da ai raitim shawa masha ni san da ai gasan ni law ai majaw, daini lani mi bai jat galaw nga ai re.
Du sa shawa masha ni hta, Putau, Sumprabum, Myitkyina, Hugawng, Danai, Hpakan, Mandalay, Sammung, Wanleng lam masawn, Tachilik hte Chyai Tung ginra de na lawm ai lam, chye lu ai.
KIO ningbaw yan hku nna mung, NCA hte seng nna amyusha rawt malan hpung 16 shanglawm ai NCCT hku nna shakut mat ai lam, dai kawn ya Senior Delegation, lahta tsang salang hpung hku nna shakut ai kaw du hkra mani na zuphpawng e tum paw hkren sanglang dan sai re.
Myen gumsan magam Slg. Ting Tsing gaw, NCA hpe hkap la sen htu shangut na matu amyusha rawt malan hpung 15 de August 11 ya nhtoi laika hte kahtap lajin dat sai re.
Ndai ten hpunau KNU, Kayin Amyusha Hpung hku nna gaw NCA hpe sen htu na daw dan sai hte, dai lam hpe ngam ai myit rum rawt malan hpung ni hpe mung zinlum mat na re lam, KNU a August 15 ndau hta htang shana dat sai.
KNU a ndai sat lawat gaw NCCT malawm uhpung 16 “yawng myit n hkrum yang, sen n htu na” ngu ai hpe lale ai lam mung re.
2011 ning kaw nna ningdaw kalang bai Myen asuya hte majan byin nga ai KIO hku nna gaw, daphpawm hku nna galaw sa wa ai NCA hpe tinang hkrai sha ‘sen htu na n htu na’ dawdan na n re lam, Laiza e nga ai Myen-KIO ginrun manghkang hparan masit komiti malawm Du Kaba Nhpang Naw Bu, KNG Jinghpaw Shiga Dap de tsun ai.
Amyusha lawt lam hta arau jawm galaw sa wa na matu KIO hte 2011 ning hta MoU htu da ai, maigan daju Jinghpaw Wunpawng Amyusha Hpung KNO gaw, “Myen asuya gaw Federal hpe n hkap la ai majaw hte tinang J.W mungshawa ni mung n hkap la ai majaw, NCA hpe KIO hku nna sen n mai htu ai lam, August 11 ya shani ndau laika shapraw dat sai re.
“Shanglawt ningbaw ni hku nna anhte amyusha ni hpe ra ai majaw sen htu ai ngu n mai galaw ai. Ra ai majaw shanglawt lu hkra woi galaw na ngu ai ndai gabaw de sha sa ra ai,” nga KNO ningbaw hte UNFC amyusha hpyen masa mung masa daphpawm a CEC amu gun komiti malawm mung rai nga ai Duwa Bawmwang La Raw sadi jaw tsun wa sai re.
Rawt malan hpung ni maga, NCA sen htu ai hta Wa (WNO), Kokang (MNDAA), Balawng (PSLF/ TNLA), Rahkai rawt malan hpung lahkawng (AA hte ANC) hte Lahu (LNU) ni hpe mung shalawm na tang madun ai raitim, asuya maga n hkap la ai re.
NCA hte seng nna, August 21-23 ya shani Htai mung Chiang Mai mare hta galaw na amyusha rawt malan hpung ni a hkrum ra zuphpawng e dawdan na hkyen nga ai re.
0 comments:
Post a Comment