Naypyidaw mare daju hta Myen asuya ningbaw ni lapran daru magam gashun hkat ai mabyin a hpang, KIO ginjaw ginra grupyin na Myen shawnglam hpyenla nkau, yu mat wa ai lam chye lu ai.
Nkau Manmaw lam hku nna nkau Myitkyina lam hku nna yu mat ai re lam, myi chyaw mu ai ni hte KIO salang ni hku nna chye lu ai re.
August 12 shana yuptung ten Naypyidaw USDP pati ginjaw rung zuphpawng e byin ai daru magam gashun hkat ai poi hta, hpyendap madi shadaw ai hpyendu dingsa Gumsan Magam Slg. Ting Tsing hpung gaw shi hte masa shai hkat ai rapdaw ningbaw Tura Shwi Man hpe ya asuya daru magam lu USDP pati ningbaw lit kaw nna shapraw kau sai re.
Bai nna Shwi Man hte ni kahtep ai USDP pati na salang yawng, nkau hpe shapraw kau nna nkau hpe madang jahkrat kau ai re.
Shawng de hpyendap asuya ten No.3 daru magam kaba dik Slg. Shwi Man gaw, du na November ra lata poi hta dang na maram lu ai, Slg.jan Awng San Su Chyi woi awn ai NLD pati hte mungmasa hku nna ni kahtep ai majaw shi hpe ya na zawn shapraw kau ai rai na re lam, mu mada tawn ai re.
Myen asuya gaw, NCA Mungdang Ting Gap Hkat Jahkring Ga Sadi ginchyum dat wa na mahka KIO hpe hpyen masa dip n-gun jaw nga ten, ya na zawn Naypyidaw de shut shanut wa nna shawnglam hpyenla nkau shaga la ai lam galaw ai rai nga ai re.
0 comments:
Post a Comment