Thursday, August 13, 2015

Myen daru magam gashun hkat: asuya pati ningbaw shapraw kau hkrum


Myen asuya ningbaw ni lapran daru magam gashum hkat ai kata, rapdaw ningbaw Slg. Tura Shwi Man hpe shi lit la nga ai USDP, mungdan uphkang nga ai pati ningbaw shara kaw nna shapraw kau sai re.

Ndai poi hta hpyendu dingsa gumsan magam Slg. Ting Tsing a hpung maga ka-up kau lu ai lam re.

Nepyidaw e daju ai Pyi-Hkai-Hpyu (USDP) pati ginjaw rung hpe mani bat Masum Ya shani shimlam dap ni shara la tawn nhtawm, zuphpawng na pati salang kadai hpe mung shinggan n le shangun ai re.

Slg. Shwi Man hpe mung shi a Naypyidaw dum nta e shimlam dap ni wang da ai lam chye lu ai.

Bai nna shi hte ni kahtep ai Slg. Mawng Mawng Ting hpe mung shi gun hpai ai pati a ninggawn amu madu magam lit kaw nna jahkring kau sai re. Matut nna Shwi Man hte ni kahtep ai pati lahta tsang salang ni hpe mung madang jahkrat kau ai lam, bat Mali Ya shani USDP pati ndau hta mu lu ai re.

Pati ningbaw n’nan hku nna Shwe Man a shara hta ningtau ningbaw Slg. Hte U hpe galai nna ninggawn amu madu shara hta Slg. Tin Nai Ting hpe galai bang ai hta, shan gaw gumsan magam Slg. Ting Tsing hte ni kahtep ai yan re lam chye lu ai.

Myen mung hta ra lata poi galaw na shata masum sha ra ai ten, ya na zawn hpyendap madi shadaw ai USDP pati kata daru magam gashun hkat ai manghkang pru wa ai re.

Ndai bat pru de, lahta tsang du 149 gaw USDP pati hku nna ra lat poi shang na matu hpyendap na pru hkring sa sai re. Raitim bat Masum Ya shani pati ginjaw zuphpawng e shanhte hta na marai 59 hpe sha, ra lata poi shang na hkap la ai re.

2011 ning du hkra mungdan hpe uphkang ai hpyen asuya hta Shwi Man gaw no.3 daru magam kaba htum re. Raitim, shi gaw ya ten Amyusha Democracy Ginjaw (NLD) pati ningbaw, Nobel simsa lam kumhpa lu, Slg.jan Awng San Su Chyi hte mungmasa hku nna mahku mara lam kaja hkra gawgap nga ai lam chye lu ai.

NLD gaw 1990 ning ra lata poi e me dang ai raitim hpyendap asuya gaw mungdan daru magam ap ya na tsepkawp nyet kau sai re.

Ya kalang bai du wa Nov. 8 ra lata poi hta NLD pati bai dang wa na masa nga ai re. Raitim, Awng San Su Chyi a gumsan magam tai na lam hpe hpyendap jum manat ai 2008 gawda ai tara hta pat hkum tawn ai re.

Gaw da ai tara hta, hpyendap gaw ra lata poi n shang ra ai sha rapdaw shara 25% hpe madu lu ai re. Bai nna tara upadi gram lajang ai hta rapdaw hta me 75% lu yang she mai na re majaw, gara hku mung hpyendap n madi shadaw yang, dai gaw da ai tara gram na n mai byin ai re.

2011 kaw nna democracy hkrang galai shai wa ai Myen mung hta, hpyendap a daru magam manat ai shayawm ra wa sai raitim, ndai zawn daru magam gashun hkat ai mabyin gaw hpyendap daru magam matut manat mayu ai sat lawat rai nga ai re.


0 comments:

Post a Comment