Friday, February 20, 2015

Saranum 2 a manghkang lau sawk shapraw ya na matu Netherlands du Jinghpaw ni n-gun madun

Brussels Myen sumtsan salang rung shawng kaw ndai zawn Jinghpaw ni ninghkap n-gun adun nga yang

Hkum shan roirip zingri sat hkrum ai Jinghpaw Wunpawng Hkalup Hpung Ginjaw (KBC) Laika Hpaji Sasana Apnawng Saranum 2 a manghkang mabyin teng sawk shapraw ya na matu hte Laiza Hpyen Du Shalat jawngma ni si ai manghkang hparan shapraw ya na matu Netherlands du Jinghpaw Wunpawng myu sha ni woi awn let n-gun madun mat ai.

Dai hpang Jinghpaw Mungdaw kata Myen asuya dap a hpyen n-gun jat ai lam ni dawm kau na matu hte jet ai Federal Munghpawm gawgap sa wa na matu ni hte hpawn lawnglam 5 hpe February 19 ya shani ka-ang hkying 12:00 jan kawn shana daw hkying 3:00 du hkra Belgium mungdan Brussels mare daju e jung ai Sumtsan Salang Rung e Jinghpaw Wunpawng Uhpung Uhpawng-Netherlands (KCNL) woi awn nhtawm hpyi shawn n-gun madun mat ai lam rai mali ai.

“Daini madung gaw saranum yan a manghkang sawk shapraw ya na matu, Laiza hpyendu jawng hpe gap ai majaw du jawngma marai 23 si ai manghkang hpe Myen asuya kawn lawan ladan mahtai tam nna KIO hpe hparan jasan na matu, hpyen yen tsin-yam masha ni hpe jaw ai garum ntum arai ni la kau ai zawn, lagu la kau ai zawn re n galaw na matu, garum madi shadaw ai ni hpe dingbai dingna n jaw na matu,  ya byin taw ai manghkang gaw hpyen masa manghkang n re. Mungmasa manghkang re majaw mungmasa hpe ku ntsa kaw bawngban mahtai tam na matu hpyi shawn ai re” nga KCNL ningbaw Slg. Mwihpu Bawk San tsun ai.

Shanhte hpyi shawn ai lawnglam ni hpe Belgium na Myen sumtsan salang rung de jaw ai zawn EU rapdaw, Netherlands rapdaw hte mungdan gadaga tara rung (international court) ni de mung kanan shalai jaw na matu hkyen lajang nga ai nga shi kawn tsun ai.

“Daini Myen sumtsan salang rung kawn lit nga ai ni hte hkrum na matu hpyi shawn ai raitim shanhte ningdang ai. Marawn ai lamang ni galaw ai. Saranum yan sat hkrum ai sumla ni sharawt ai. Bai nna ramma ni hpe wan nat sat hkrum ai sumla ni, simsa lam bawngban na matu, tara rap-ra ai lam lu na matu. Jinghpaw mungdaw hta tara rap-ra ai lam ni nga wa na matu hpyi ai” nga tsun ai.

Netherlands mungdan hta Myen sumtsan salang rung n nga ai majaw Jinghpaw Wunpawng uhpung uhpawng (KCNL) woi awn nhtawm Belgium Mungdan na Myen Sumtsan Salang Rung shawng e sa du nhtawm n-gun madun ai lam hta Jinghpaw Wunpawng myu sha ni hte arau Mun, Rahkai, Kayin, Sam amyu sha ni hte Amyu Sha Democracy Hpung Ginjaw (NLD-LA) ni shanglawm mat nna yawng marai 60 hkawt n-gun madun mat ai nga Slg. Mwihpu Bawk San kawn tsun ai.

Ya yang Myen mung hta jet ai simsa lam hpe hkrang shapraw ai lam n nga ai majaw Gumsan Magam Slg. Ting Tsing asuya hpe amyu sha bawsang ni makam n nga ai majaw ya na zawn hpyi shawn dat ai re nga Netherlands mungdan NLD-LA Ningbaw Slg. Myin Nai tsun ai.

“Shanhte hpyi shawn ai gaw Myen mung hta ya yang byin taw nga ai lawnglam amyu myu hte amyu sha bawsang ni ntsa gasat nga ai manghkang ni le i. Mara n nga ai mungshawa ni ntsa mara gata zingri zingrat nga ai lam ni hpe jahkring nan jahkring ya na matu. Rara masa ka-up ai lam ni hpe mung hpyi shawn tawn ai. Madung gaw shanhte Slg. Ting Tsing asuya hpe n kam ai le i” nga shi kawn tsun ai.

Lai wa sai January 19 ya shani e Lahta Sam Mung, Muse ginwang Pangsai (Chyu Kuk) ginwang daw Namtau mare Kawng Hka kahtawng na KBC laika hpaji sasna apnawng saranum Maran Lu Ra hte Tangbau Hkawn Nan Tsin yan hpe hkrum shan roirip nhtawm sat hkrum ai shata mi ladu hkrum ai ninghtoi mung rai nga ai. Dai hte maren 2014 ning November 19 ya shani Wunpawng Mungdan Shanglawt Hpung (KIO) ginjaw hpyendu jawng e Myen asuya dap kawn laknak kaba gap bun ai majaw Du Jawngma 23 si mat ai shata masum ladu hkrum ai ninghtoi mung re majaw Netherlands du Jinghpaw Wunpawng myu sha ni n-gun madun ai lam re nga chye lu ai.

Apnawng saranum yan a manghkang hte seng nna mabyin teng sawk shapraw lu wa hkra ngu; February 19 ya manap hkying 6:00 kawn February 20 manap hkying 6:00 du hkra hkying hkum 24 lu shagam akyu hpyi na matu KBC kawn ndau shana da ai majaw daini gaw mungdan kata/shinggan hkan e shanu nga ai hkristan Nu Wa ji nban ni mung shing shing rai lu sha gam akyu hpyi ai lam galaw shajang nga ma ai.


0 comments:

Post a Comment