Chyat rawng nga ai Hpakan hpyen yen ni hpe 8 mali jawngma ni sa garum na

8 mali Myen jawngma ningbaw ni Hpakan de gawan du yang, 2012

8 Mali jawngma hpung gaw Jinghpaw Mungdaw Hpakan ginwang Ginsi mare kata na Jinghpaw hpyen yen tsin-yam masha ni a matu n-gu buri 1,000 hte laga malu masha ni sa garum na re lam 8 Mali Jawngma Hpung Ningbaw Ko Ma Ae kawn tsun ai.

Sra Daw Ya-we Noi (Inma) hte Myitkyina mare buga masha ni garum jaw dat ai arai ni hpe 8 mali jawngma ningbaw ningla ni hku nna Hpakan ginwang Ginsi mare hta shingbyi nga ai Jinghpaw tsin-yam masha 2,000 hkawt hpe hpawtde January praw (5) ya shani Myitkyina kawn Hpakan de rawt wa na re lam chye lu ai.

“N-gu buri hkying mi hte sau ni lawm ai. Hpawt de gaw rai htaw mawdaw kaba ni hte sa na. Hkyen nga dingyang naw re” nga Ko Mya Ae kawn tsun ai.

Jawngma hpung ningbaw Ko Mya Ae, Ko Pyung Chyu, Ko Awng Lat, Ko Nyan Lin ni gaw February praw 4 ya shani Myitkyina ginwang e du taw nga sai rai nna hpawtde she Ko Jinmi, Ko Min Ko Nai, Tsan Chyawng Ko Ko Ji, Ko Ko Lai ni hte arau sa jaw na lam rai nga ai.

Wunpawng Mungdan Shanglawt Hpyen Dap (KIA) Dapba (2) npu Dapdung (6) hpyen hpung ni hte Myen asuya hpyen dap lapran lai wa sai January (15) ya shani kawn majan byin mat ai hta Awng Ba Le (Tang Gau) mare masha marai 2,000 hkawt majan gaiwang kata chyat rawng nga ai tsin-yam masha ni hpe sa garum na rai nga ai.

Dai mare ni hpe Hpakan ginwang kawn nawku hpung salang ni, Simsa Lam Akyu Galaw Hpung (PCG) ni sa shaga la na matu shakut yu sai raitim Myen asuya dap Dapnu Masat (66) kawn dung up wa ahkang n jaw ai majaw n lu shaga la mat hta ya yang dai mare masha ni gaw Ginsi mare hta shingbyi nga ai lam rai nga ai.

Awng Ba Le mare masha nkau gaw Hpakan ginwang kata na Jinghpaw Wunpawng Hkalup Hpung Ginjaw (KBC) a Nam Majit hpyen yen tsin-yam dabang de hpawng yen bang mat ai nga Awng Ba Le mare kawn ma shapan jawng Saranum Hkawng Naw tsun ai.

“Anhte Awng Ba Le kaw n mai nga mat ai majaw mani Hpakan maga de ladat amyu myu hte mahkrun tam nna hprawng yen wa ai. Yak hkak ai lam chyawm law ai. Ya Hpakan de na nawku hpung ni kawn hkyela ai majaw mani kaw na she Hpakan Nam Majit Tsin-yam Dabang kaw nga lu ai. Ginsi kaw gaw jawngma ni daining na san poi htai na matu ngam nga ta sai. Chye ai hku hprawng yen wa ai.”

February praw (2) ya shani Myen asuya dap kawn n-gun 100 jan hte htim gasat lung wa ai majaw KIA a Dapdung (6) shawnglam dap langai rai nga ai Danyin Kung hpe htingnut kau ra mat ai nga chye lu ai.

2013 ning kawn byin mat ai majan a majaw shingbyi nga ai Nam Majit tsin-yam dabang hta Awng Ba Le mare masha nkau kahtap hprawg bang wa ai majaw ya yang tsin-yam masha 300 daram rai wa sai re lam shi kawn tsun ai. Ginsi mare hta Awng Ba Le kawn htawt sit bang wa ai jawngma ni hte hpawn hpyen yen tsin-yam masha 100 jan shingbyi nga ai lam chye lu ai.

Posted in: SHIGA