Monday, February 2, 2015

Myen asuya dap kawn Jinghpaw ramma 3, slg 1 hpe wan nat sat

Myen asuya dap a wan nat sat da ai mare masha 4 a moimang hpe sat da ai shara, Law Hkum Bum e lup makoi nga yang

Lahta Sam mung Muse ginwang Malun Bum Hka kahtawng na ramma 3 hte hpawn marai mali hpe Myen asuya hpyen dap ni rim mat ai hpang 7 ya mat mat ai kawn wan nat sat da ai mang hpe January 31 ya shani mu la ai nga Malun Bum Hka kahtawng na Sara Ja Hkun Awng tsun ai.

Muse-Nampaka lam nmaw ntsa na Malun Bum Hka kahtawng kawn Shd. Mahkaw La Ja asak (21) ning, Shd. Lahtaw Hkun Hpung asak (18) ning, Hu Hpyet mare kawn Shd. Maran Yaw Han asak (20) ning hte Slg. Doi Ring ni a wan nat sat da ai moi mang hpe February praw (1) ya shani Law Hkum Bum hta makoi mayang dat ai lam rai nga ai.

Dai si mat ai ni kawn marai 3 rai nga ai Shd. Lahtaw Hkun Hpung, Shd. Mahkaw La Ja hte Shd. Maran Yaw Han ni hpe lai wa sai January 25 ya shani Myen hpyen dap ni kawn rim mat wa ai hpe mare masha ni tam sagawn hkawm ai kawn mu la ai lam re nga Sr. Ja Hkun Awng tsun ai.

“Shanhte ni mare kawn le wa ai shaloi hpyen hpung hte hkrum nna rim hkrum mat ai. Mare masha ni majan zim ai hpang sa tam yu yang wan nat sat da ai hpe mu ai majaw mare masha ni hte sara ni hpe sa shaga nna mani gaw shanhte si ai shara Law Hkum Bum kaw sa makoi mayang dat ai” nga shi kawn tsun ai.

Shd. Lahtaw Hkun Hpung, Shd. Mahkaw La Ja, Shd. Maran Yaw Han ni gaw shanhte a mare makau na nra dabang de bungli galaw na matu sa wa ai lam e Myen asuya dap kawn rim woi mat ai lam rai nna, shanhte marai 3 hte arau sa wa ai Shd. Maran La Doi chyawm gaw hprawng lawt mat ai nga Malun Bum Hka kahtawng masha Shy. Bawk San kawn Jinghpaw Shiga Dap de tsun ai.

“Shanhte hpe January 25 ya shana daw hkying 3:00 ram hta rim mat ai. Myen asuya dap ni rim mat ai ngu hpe chye ai. Hkun Hpung na manang La Doi bai hprawng lawt wa ai. Shi chyawm lahput kaw pala loi dingtset mat ai” nga shi kawn tsun ai.

Dai Malun Bum Hka mare masha marai (4) wan nat si taw nhtawm mare kahtawng masha ni makoi mayang ai sumla ni hpe Internet dinghkrai shiga ginlen pinra (social media) ni hta mung gajai gumhkawng nga ai hpe mu lu ai.

Shanhte marai 3 a mabyin hte seng nna san sagawn ai lam ni nga n nga tsun shaga yu ai raitim dai manghkang hte seng nna ‘n chye ai lam’ Muse ginwang Pyada Dap kawn lit nga ai ni htang tsun mat ai.

Lai wa sai January 19 ya shani Lahta Sam Mung Pangsai (Chyu Kuk) ginwang Namtau mare Kawng Hka kahtawng hta Jinghpaw Wunpawng Hkalup Hpung Ginjaw (KBC) kawn laika sasana apnawng saranum 2 hpe mung roi rip nhtawm zingri sat kau sai rai malu ai.

January 25 ya shani asuya dap hte Wunpawng Mungdan Shanglawt Hpyen Dap (KIA) a Dap Ba (4) npu Dap Dung (9) Dap Kung (2) lapran majan byin mat nna asuya dap kawn n-gun jat htu lung wa ai majaw dai KIA Dap Dung (9) Kung (2) shawnglam dap (Law Hkum Bum Dingsa) kawn htingnut kau dat ya ai re nga KIA Ba (4) kawn du salang ni tsun ai.
 
Lahta Sam Mung Muse ginwang hte Kut Hkai ginwang kata KIA hte Myen asuya dap ni January 31 ya du hkra majan shani shagu ngu na byin mat nhtawm, ya yang e mung Myen asuya dap ni hte grai ni kahtep taw nga ai majaw KIA Dap Dung (9), (36) hte (38) ginra ni hta majan kahtap nna byin na masa nga ai nga shi kawn tsun ai.


0 comments:

Post a Comment