Federal munghpawm de na myit hkrum lakmat htu na ngu UNFC tsun

Hkun Uk Ka, UNFC amu madu-1

Du na February 12 ya shani wa ang ai (58) ning hpring Munghpawm Nhtoi hta Federal Munghpawm gawgap lam myit hkrum ga sadi lakmat htu na matu Amyu Sha Hpyen Masa Mungmasa Dap Hpawm (UNFC) gaw January 29 ya shani tsun ai.


Gumrawng gumtsa lam, amyu sha rap-ra lam hte madu uphkang ahkang aya hte hpring tsup ai amyu sha mungdaw ni hpe ningpawt ai federal munghpawm gawgap lu wa na lam hpe lashum nhtawm “Federal Munghpawm gawgap lam hte seng ai myithkrum lam” hpe masat dingsat lata masat htu lawm mat na lam shangang shakang dat ai” ngu numshawn shaw dat ai lam rai malu ai.

“Federal munghpawm gawgap na lam hpe Gumsan Magam hku nna radio mungga hkan e mung tsun ngut sai, ya radio kaw hkum htawn sanu… ga sadi laika hta jawm ka na matu myit hkrum ai. Amyu sha rawt malan hpung ningbaw ningla ni mung ga-garan mat na ni, shanglawt ndau na ni n nga ai. Shada da jahkrup nhtawm munghpawm gawgap sa wa na ngu ai ga sadi hpe munghpawm nhtoi hta lu jang hkrak ai. Dai hpe numshawn shaw da ai” nga UNFC kawn Amu Madu Dukaba Hkun Uk Ka tsun ai.

Dai myit hkum lam hpe lakmat htu ai a marang Gumsan Magam Slg. Ting Tsing hte amyu sha laknak hpai hpung ni a shada da mahku mara lam grau grau ngang kang wa nhtawm gap hkat jahkring lakmat htu na lam hpe mung ten garawt lanyan ai lam n nga ai sha shakre la lu na lam hpe mung shakut ai masa hte bung ai ngu ndau ai laika hta kapyawn shaleng da ai.

2014 ning December praw 2 ya shani Slg. Ting Tsing a radio mungga hta “federal munghpawm gawgap lam ngu ai mungmasa myit hkrum lam hpe ngang ngang kang kang lu da chyalu rai sai” nga htawn tsun mat ai.

Myen asuya hte amyu sha laknak hpai rawt malan uhpung ni mungdan ting gap hkat jahkring lata masat htu lu na matu lahkawng maga hkrum shaga bangban na naw ngam nga ai lam hte amyu sha laknak hpai hpung nkau hte majan naw byin nga ai majaw re lam Dkb. Hkun Uk Ka tsun ai.

Lahkawng maga hkrum shaga bawngban na matu naw ngam ai lawnglam ni gaw Laiza Hpyen Du Shalat Jawng ma ni si ai lam ntsa bawngban na lam, lahkawng maga nan hkan sa ra ai tarawng tara hte ginrun yu reng komiti hpawng shabawn na lam hte hpawn dawshan (5) hkawt naw ngam ai lam rai mali ai.

Slg. Ting Tsing gaw February 12 ya Munghpawm Nhtoi hta amyu sha laknak hpai hpung ni hte Ne Pyi Daw e hkrum shaga bawngban na matu saw shaga ai nga na chye lu ai hte maren amyu sha laknak hpai ningbaw ningla ni mung Federal Munghpawm gawgap na lam ra sharawng ai majaw yawng sa du na hpe myit mada ai lam Dkb. Hkun Uk Ka kawn tsun ai.

Myen mung shanglawt lu ai nhtoi January praw 4 hpyen hprim poi lamang hta gap hkat jahkring da ai laknak hpai rawt malan hpung 12 hpe sha saw shaga nhtawm January praw 5 ya shani dai hpung 12 kawn dat kasa ni hte Slg. Ting Tsing hkrum shaga bawngban mat ai.

UNFC hpe amyu sha laknak hpai hpung 12 hte 2011 ning February shata kawn hpaw shabawn hpang ai rai nga ai. 2014 ning September kaw galaw ai hkumra hpawng hta Kayin Amyu Sha Uhpung Uhpawng (KNU) gaw hpung shang kawn gan le mat wa sai. Dai hkrumra hpawng hta Myen Mung Amyu Sha Democracy Dap Hpawm MNDAA (Ku Kang) gaw hpung shang lai wa masai.

Posted in: SHIGA