Asuya kawn wa-lang gale nga ai jasat jahkring ging sai lam UNFC tsun

UNFC ningtau ningbaw Nai Han Ta

Lahta Sam Mung mare kahtawng na Jinghpaw Wunpawng Hkalup Hpung Ginjaw (KBC) kawn dat ai Laika Sasana apnawng Saranum 2 hpe roirip nhtawm sat kau ai manghkang gaw hpyen tara tawt lai shut shai ai lam rai nhtawm wa-lang gale ai jasat hpe jahkring ging sai lam Amyu Sha Hpyen Masa Mungmasa Dap Hpawm (UNFC) kawn tsun ai.

UNFC gaw Myen asuya dap kawn htim maden gasat ai lam ni jahkring na matu hte hpyen tara tawt lai wa-lang gale ai jasat ni hpe kalang dat jahkring na lam, amyu sha hpaji lam tara masan hpe kalang bai gram lajang ya na lam prinem ai ladat hte n-gun madun ai jawngma ni ntsa seng ang ai daru magam manat ai ni kawn rim ahkyak la wa ai lam ni nga wa na hpe tsang ai lam ni hte maren ya yang byin nga ai masa ntsa la-kap nna UNFC kawn January 28 ya shani ndau laika shapraw dat ai lam rai malu ai.

“Dai gaw hpyen tara tawt lai ai lam rai nga ai. ‘War Crime’ tara masan hta lawm ai ngu shadu ai. Dai majaw majan hpe jahpai nna maden ai lam ni… hpyen tara tawt lai shut shai ai lam ni gaw tsaw dik mara re nga yang dai hpe alak mi ahkyak la ai lam ni n nga ai. Dai zawn tawt lai ai lam ni n galaw ging ai” nga UNFC Shingtau Amu Madu (1) Dukaba Hkun Uk Ka tsun ai.

January 19 ya shani dai apnawng saranum yan hpe roirip zingri nhtawm sat kau ai mabyin gaw hpyen masa manghkang hpe jahpai nna shinggyim ahkaw ahkang tawt lai shut shai ai lam ni, sawng dik ai hpyen tara tawt lai nna wa-lang gale ai lam ni hpe kalang dat jahkring ra ai nga UNFC ndau laika hta shaleng da ai.

Myen asuya a Democracy ladat hte n bung pre ai amyu sha hpaji lam tara masan hpe kalang bai gram lajang ya na matu simsa ai ladat hte n-gun madun ai jawngma wu-nawng wuwa hpe seng ang ai daru magam manat ai ni kawn n-gun sung la-ba ka-up na mahkrun ni mu mada taw ai majaw tinang UNFC kawn mung tsang nga ai lam ndau shaleng da ai.

Dai hpang January 14 ya shani kawn Jinghpaw Mungdaw Hpakan ginwang hta Myen asuya hpyen dap hte Wunpawng Mungdan Shanglaw Hpyendap (KIA) lapran, Lahta Sam Mung hta KIA hte hpawn TNLA, SSPP dap hpung ni lapran shara shagu ang katut gasat gala lam ni byin nga nna majan grau grau laja wa na masa nga nhtawm buga ginra kata grau grau shuk wa chye ai nga tsun tawn ai.

Ya yang TNLA hte Jinghpaw Mungdaw Hpakan ginwang na KIA dap hpung ni a seng ang ai du salang ni tsun ai masa hku nga yang, ya yang majan ni matut manoi byin nga ai zawn Myen asuya dap ni n-gun jat ai lam ni nga ai majaw majan grau laja wa na masa pru ai lam Dkb. Hkun Uk Ka kawn tsun ai.

2014 ning November 19 ya shani Wunpawng Mungdan Shanglawt Hpung (KIO) Ginjaw Laiza na hpyendu shalat jawng hta Myen asuya dap kawn gap bun ai laknak kaba hte hkrat sum mat ai Du jawngma 23 hte hkala marai 20 hte seng nna asuya kawn tara shang hparan ai lam daini du hkra n nga ai majaw mungdan ting madang gap hkat jahkring lam matut hkrum shaga bawngban na matu ra rawng ai lam langai re majaw asuya a htang shana ra na lam shi kawn tsun ai.

“Dai zawn tawt lai lam ni, dai zawn manghkang gin jat ai lam ni, n-gun jat bang wa ai lam ni… dai zawn galaw nga ai lam ni gaw mungdan ting gap hkat jahkring ga shaka la na lam hta wa-hkye-hkye mat ai le. Gap hkat jahkring lu na matu majan n nga hkra shawnglam dap ni htingnut da ya ra ai. Shamu shamawt ai lam ni shazim da ra ai. Dai zawn lama ma galaw dan jang she gap hkat jahkring lam sakse hpe madun ai lachyum mu na le. Dai zawn gap hkat jahkring mayu ai arawn alai hpe galaw ai hpang she gap hkat jahkring lakmat htu ai ngu gaw loi li lachyum nga ai” nga Dkb. Hkun Uk Ka tsun ai.

Dai majaw Myen asuya dap a htu gasat ai lam hpe kalang dat jahkring nhtawm sim sim sa sa hkrum shaga bawngban mahtai tam ai lam, hpyen tara tawt lai shut shai ai ni hpe ahkyak la sa wa lu hkra mabyin teng hpe lawan ladan sawk shapraw na lam hte jawngma wu-nawng a prinem simsa ai ladat hte n-gun madun ai lam hpe n-gun sung hparan ai lam n galaw ai sha hkrum shaga tsun jahkrup ai ladat hte hpran ai lam ni hpe Gumsan Magam Slg. Ting Tsing asuya a galai shai ai gram lajang masa bungli yi-ngam gaw tengman ai lam brang brang lang lang mu mada ai lam nga hkra sakse madun na lam alak mi hpyi shawn dat ai.

Ya yang na masa a majaw Myen asuya hte amyu sha laknak hpai rawt malan hpung ni lapran mungdan ting madang gap hkat jahkring na lam a matu mayak law law nga ai nga Dkb. Hkun Uk Ka tsun ai.

Dai mabyin ntsa UNFC gaw n htang de htingnut ai masa wa pru ai ngu maram da nhtawm mungdan kata simsa lam gawgap ai lam hte hkrum shaga bawngban nga ai hpunda mahkrun ni zang ayai mat mai ai jasat re ngu mu mada ai lam UNFC a ndau laika hta shaleng da ai.

Posted in: SHIGA